African Swine Fever (ASF) a leng mek a, a nasa tia sawi tur ni chiah lo mah se hmun hrang hrangah a darh zel. Mizoram district pariatah ASF hi finfiah a ni tawh.
March ni 20-ah ASF hi finfiah a ni a, hun engemaw chen chu hmun hrang hrangah darh lovin, district pali-ah chauh he hri hi a leng. July atang khan district dang a thleng a, thla khat vel chhungin district dang pali-ah finfiah a ni.
Kuminah ASF finfiah hmasakna chu Mamit district a ni a, chumi hnuah Lawngtlai, Siaha leh Lunglei district-ahte finfiah niin, July ni 5 thleng khan heng district pangaah chauh hian a leng. July ni 6-ah Khawzawl district a lang a, July ni 21-ah Champhai district a lang ve leh. August thlaah Hnahthial district-ah hmuh a ni leh a, finfiah hnuhnun berna Aizawl district chu August ni 4-ah a lang tan.
District dangah he hri hi a darh na a, finfiahna hmasa district-teah a zia thung. District thenkhatah phei chuan he hri vanga vawk thi report a awm rih lo.
ASF hi 2021-ah Mizoramah finfiah a ni a, chumi hnu chuan kum tin a la leng. AH&Vety department hotute chuan kum hmasate nena khaikhinin kumin hi a nasa lo an ti.
June leh July hi he hri len nasat lai a nih thin thu an sawi a, kuminah chuan June leh July-ah pawh a nasa lem lo an ti.
AH&Vety department chhinchhiah danin, ASF vang hian kuminah Mizoramah vawk 7980 a thi tawh a, vawk 3315 tihhlum/suat a ni tawh. District pariata khaw 141-ah he hri hi hmuh a ni tawh a, a tuartu zat hi chhungkaw 3126 an ni.
District pariatah ASF darh ta
