District thar pathumah sawrkar department 27 hawng thar tawh

Mizoram sawrkarin district thar pathum – Khawzawl, Saitual leh Hnahthial a hawn hnu ah hengah te hian sawrkar department 13 district office upgrade a ni tawh a, department 27 hawn thar a ni tawh bawk.
He thu hi Human Resources Development Board vice chairman Dr L Thangmawia, MLA chuan Thawhtannia Saitual District Village Council Association Assembly, Rulchawma neih a hmanpuinaah a sawi a. Kum 2008-a MNF sawrkarin Saitual, Khawzawl leh Hnahthial district-a a lo puan tawh chu kum 10 hlamchhiahin a awm a, district-a puangtute rilru pawh a na hman hle, tia sawiin, “Pu Zoramthanga kaihhruai MNF sawrkar bawk chu Pathian leh mipui zarah 2018 kum tawpah a piang leh a. Sawrkar thar chuan kum 10 kaltaa district a lo puan tawh pathumte chu tuaihnum nghalin, Covid hrilen lai pawhin heng district tipuitling turin hma a la char char a, tunah chuan bawrhsap dah fel vek a ni tawh a. A tahtawlin district office hrang hrangte dah chhoh zel an ni,” a ti.
Saitual district bikah department 8 chu district office-ah upgrade ni tawhin, department 5 hawn thar a ni tawh a. A vaiin district thar pathumah hian department 13 district office-ah upgrade tawh niin, department 27 hawn thar a ni tawh tih a sawi.
Covid hrilen laia VC-te hah zia a taka hmutu a nih thu Dr L Thangmawia hian a sawi a. “Khawtlang mipui nen kan tanrualna azarah Mizoram khawtinte hi India rama hri do kawnga thawk tha ber kan nih ka ring a ni,” a ti. Sawrkar hmalakna zawng zawng deuhthawah VC-te chu sawrkar kut-ke an nih thu leh an tel loa sawrkarin hna pawh a thawh theih loh tam tak a awm thu a sawi a. Chu’ngah chuan rinawm leh dik taka an mawhphurhna mipui tan hlenchhuak zel turin VC member-te a ngen tih a sawi a ni.
“Mizoramah hian kum 1954 hmalam zawng kha chuan Mizo lalte kutah khawtlang enkawlna awmin, lal ban a nih hnu ah khawtlang enkawlna chu khawtinin kan thlanchhuah village council-te kutah a awm ta a. Lal te khan neitu thinlung tak tak pu in an khuate an enkawl thin a, kum 1954 hnulama VC-te kuta thuneihna dah a nih hnu hian lalten an khawtlang tana an rilru put thin dan hi VC member-ten kan pu pha zel em, tih chu VC member-te inzawt thin se ka duh a ni,” Lengteng bialtu MLA hian a ti.
Saitual District Village Council Association Assembly hi Saitual district a pian hnua a vawikhatna a ni a. MLA Dr L Thangmawia bakah Saitual district bawrhsap VL Hruaizela Khiangte ten an hmanpui. An district huamchhungah VC 44 awmin VC member 212 an awm.