Site icon The Aizawl Post

District tinah Consumer Rights Day

Consumer-te dikna leh chanvo inzirtir tharna ni, World Consumer Rights Day 2023 denchhenin Mizoram district hrang hrangah hun hman a ni.
Lawngtlaiah chuan additional DC Abraham Beirazi Khithie hoin hman a ni a, India ramin The Consumer Protection Act 2019 a neih thu leh, chu chuan consumer-te tan hamthatna hrang hrang duang a, consumer-te dikna chanvo tha taka a humhalh sak thu a sawi.
Lawngtlai district-ah consumer-ten an chanvo palzut sak an nihin, a thlenna tur dika thlen loa ngawihbo pui mai a la tam nia a hriat thu sawiin, consumer-ten an chanvo dik an chan theihna’n huaisen a ngai a, huaisen tur chuan dan hriat a ngai tih a sawi a ni.
Khawzawlah chuan ‘Empowering Consumer’s Through Clean Energy Transitions’ tih thupui hmangin addl. DC Lalvenhima hoin hman a ni a, mitinte consumer kan ni a, kan dikna leh chanvo neihte erawh kan hriatchian a ngai hle, tia sawiin, consumer-te vuivaina leh lungawilohna thlenna tura district tina din District Consumer Redressal Commission hman tangkai a tul tih a sawi.
Serchhipah bawrhsap Nazuk Kumar hoin hman a ni a, Consumer Rights Day hman chhan ber chu thil leitu (consumer) ten dikna chanvo hlu tak kan nei tih inhrilhhriatna’n a ni, tiin, “Thil zawrhna hmun leh zawrh dan phung a inthlak chak em em a, bungrua leh hmanrua pawh a thar tha zawk a pung zelin sum leh paia inbumna pawh a pung zel a ni,” a ti.
Thil zawrh leituten online hmangin kan lei a ni emaw offline hmangin kan lei a ni emaw, consumer kan nih angin dan hnuaiah engkim fel leh dik taka leitu kan nihna tura min vengtu dan leh chu dan kengkawhtu chak tak chu kan nei a ni tih a sawi a. Engpawh lei dawn ila, kan thil lei chu enge a nih chiah tih chiang taka kan hriat a tul, tiin, “Chutianga fiah taka hriat hmasak hi kan chanvo a ni a, thil lei leh hralh thu ah inbumna lam engmah a awm loh nan chanvo tha tak kan nei tih hi hre thar leh ang u,” a ti.
Mamit-ah chuan Mizoram Consumer Union Mamit District buatsaihin hman a ni a. He hun hmanpuitu district bawrhsap Lalnunhlua chuan consumer tih thu in mitin min huap a, kan dikna chanvo uluk lehzuala belchiang a, a hre ve lo midangte hrilh chhawn zel a tul, tia sawiin, “Kan sik leh sa lo danglam zelah consumer kan nih angin, mawhphurhna hrang hrang kan neihte kan hriat tel a pawimawh a. Kan chenna leilung tichhe thei thil chu hmang fimkhur ang u,” a ti.
Champhaiah chuan chuan DCSO CC Sakhawliana chuan mitinte consumer huanga rinluh vek theih kan ni, tiin, dikna leh chanvo neihte hria a, tangkai turin mipui a sawm tih a sawi a. District & Sessions Judge kaihhruaina hnuaiah District Commission din a nih thu leh DCSO chu registrar a nih thu sawiin, vuivaina leh lungawilohna nei an hnena thu thlen duhte tan an inhawn reng tih a sawi a ni.

Exit mobile version