Daily Newspaper

District tinah RT-PCR laboratory din theihna buatsaih an phut

18

Covid-19 hrileng thawh thumna inbuatsaihna atan Mizoram sawrkar chu district tinah RT-PCR laboratory din theihna buatsaih turin an phut tih Congress party chuan an sawi a. Falkawna District TB Centre room-a awlsam taka laboratory din a nih dan ngaihtuahin, harsa lo taka tihhlawhtlin theihah an ngai tih an sawi.

Congress party thuchhuak chuan, Lungleia RT-PCR laboratory dinna tur tihkhawtlai dan ringawt zawngah MNF sawrkarin chu puhin, ‘RT-PCR hmanga MNF sawrkar politics khelh dan hi mipui hriselna atana hlauhawm tak leh mipui zahlohna dik tak niin kan ngai a. Sawrkar hmalak dan that tawk loh avanga hri kai zat tlahniam thei lo pawh, mipui hi a mawhphurtua min chhuah tawh lo turin kan ngen a ni,’ a ti.

Awmze nei zawka Covid-19 do theih nan district tinah a rang thei ang bera RT-PCR khawl hman theihna tur laboratory din turin MNF sawrkar a phut nawn tih sawiin, hei hi Covid-19 hrileng thawh thumna inbuatsaihna atana tih makmawh a nih bakah hrileng a reh tawh hnuah pawh tangkai taka natna dang chhuina atana hman theih a ni dawn tih a sawi. Falkawna District TB Centre chung ber room ruaka awlsam taka laboratory din a nih dan ngaihtuahin, he thil hi harsa lo taka tihhlawhtlin theihah Congress party chuan a ngai tih a sawi a ni.

Covid-19 hri kai a tam thei ang ber hmuhchhuah thuai a, enkawlna an dawn theihna tura Mizoram sawrkarin Aizawl khawpui chhunga endik runpui a nei tan chu lawmawm a tih thu MPCC thuchhuah hian tarlangin, kumin June 7 khan MPCC president Pu Lal Thanhawla chuan endik runpui kan mamawh zia hriain, mass testing nei tura sawrkar a lo ngen tawh na in ngaihpawimawh a hlawh dawn ta leh, hri dona kawngah sawrkar a harh tan ta nia an hriat avangin lawmawm a tih thu a sawi.

‘Sample endik runpui atan hian sawrkarin sum tam tham tak a sen a ngai dawn tih kan hria a. Amaherawhchu, rang taka a kaite hmuhchhuah an nih dawn avang leh enkawlna an dawn hma tawh dawn avangin, natna hmuhchhuah har avanga Falkawn-a Referral Hospital leh ICU-a enkawl ngai nasa takin a titlem dawn a, chu chuan sum tam tak a hum thung dawn a ni. Sample endik runpui hi Rapid Antigen Test mai ni lo, RT-PCR test hmanga a tam thei ang ber endik nise tih hi kan party duhdan a ni,’ a ti.

Hetihrual hian endik runpui nei tura eptu party-ten an rawt tirh khan awmze nei zawka kalpui ni tawh se chuan, hri kai hmuhchhuah a tam dawn bakah nunna chàn loa enkawl dam an pun lehzual a rinawm tih sawiin, ‘Hrileng hi tangruala do chi a nih avangin eptu party-te thurawn ngaipawimawh tawh turin Mizoram sawrkar kan beisei a ni,’ MPCC chuan a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy