Daily Newspaper

Djokovic a chak zel

11

Mipa Tennis player ropui ber ang hiala ngaih ni mek Novak Djokovic chuan Golden Slam puitlin tumin hma lam a pan zel a. Olympic second round-a a hma chhawn German Leanard Struff lakah set hloh lovin a chak a, third round a inhlangkai. Djokovic chak rual hian champion tura rinkai ber dawttu Daniil Medvedev pawhin hnehna a chang a, third round a inhlangkai ve bawk.

Djokovic a khel tha
Kum kal meka Tennis inelna lian awpbettu Novak Djokovic hian Struff lakah bon takin bul tan bik lo mahse set hnihnaah a khel tha hle a, inkhel hmuhnawm leh class sang tak an lantir. An che vel a hmuhnawm hle a, entute mit an titlai hle. First round aiin a khel ropui leh fe tawh a, a vawikhat nan Olympic-a champion turin rin a kai sawt hle.

World No. 1 Djokovic leh a khingpui Struff te hian hmuhnawm takin bul an tan a, an inhnehtawk chho hle. Game an inlakchhawk zak zak hnuin Serb hian break a nei a, dinhmun tha zawkah a ding hmasa zet. German Struff hian huaisen takin a bei let a, hnufual rei duh lovin a break zui ve leh nghal. 5-4 a hma a hruai laiin Djokovic hian break pawimawh tak a nei zui leh a, 6-4 a chungnungin set khatna a la ta nge nge.

Set hnihnaah an pahnihin an khel tha dun hle a, inkhel hmuhnawm tak an lantir. Set hnihna tir lamah Djokovic hian break a nei nghal mai a, awlsam takin a chak thei tura ngaih a ni hman. A serve a hloh hnuin Struff a khel tha leh ta sauh thung a, na taka a khingpui bei letin break a nei let leh. Point khat hlawhchhuak tur ngawt pawhin na taka an thawh a ngai a. Ball an inpekual tawn nasa a, an tlan kual zak zak. Inkhel hmuhnawm zet maiah hian tawnhriat nei tha zawk Djokovic a chungnung a, break a nei zui leh. Germany aiawha inlan Struff hian beilet ngial mahse a pawt thla zo tawh lova, World No. 1 lakah 6-4, 6-3 a tlawm in Tokyo Olympic a mangtha zui ta a ni.

Djokovic hian Golden Slam puitlin turin hun tha tak a nei mek. Grand Slam pathum; Australian Open, French Open leh Wimbledon ahte a champion zawn zat. Mipa zingah Golden Slam puitlin thei hmasa ber ni turin Olympic leh US Open-ah champion a la mamawh. Heng inelna pahnihah te hian a champion zawn a, Golden Slam a puitlin thei a nih chuan hnial rual lohin mipa Tennis player ropui ber a ni ngei dawn a ni.

Grand Slam-ah vawi 20 champion tawh Djokovic hian a elpui lian pahnih Rafael Nadal leh Roger Federer te tlanpel thei turin Olympic leh US Open-a champion a mamawh tak zet a. A mamawh em em neih ngei tumin hma lam a pan mek a. Tokyo Olympic-ah ngaihven a hlawh hle zel.

Mipa lamah champion tura rinkai, Djokovic kawng dal thei ber tura ngaih Daniil Medvedev chuan thawhtanni khan India chhuanvawr Sumit Nagal a hmachhawn a, a khingpui sawpin nuamsa takin a chak a, third round a inhlangkai.

Medvedev hian set khatnaah Game khat chiah a hloh a, Nagal a sawp hle. Set hnihnaah India chhuanvawr Nagal a khel tha hret a, game hnih a la tling thei hram. Mahse, Medvedev lakah hian 6-1, 6-2 in a tlawm ta tho a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy