Daily Newspaper

Djokovic-a ‘Golden Slam’ beiseina a tawp

7

Kumin grand slam tennis tournament pathum khelh tawha la chak fai vek Serbia superstar Novak Djokovic chuan Tokyo Olympics gold medal awrh chunga kumkhat chhunga grand slam pali leh Olympig gold la thei chawimawina ropui ‘Golden Slam’ a beiseina a vawngnung zo lo a, nimin khan Olympic mipa tennis semi-final pakhatah German tlangval Alexander Zverev a hneh lo.

Kum 24 mi German Zverev chuan set hmasa ber hloh zet chungin world number one Djokovic lakah 1-6 6-3 6-1 hnehna a changlet a, Pathianni final-ah fourth seed Zverev hian Russian Karen Khachanov a hmachhawn ang.

Tokyo khawpuia Ariake Tennis Park semi-final inkhel dangah world number 25 leh 12th seed ni bawk Khachanov chuan 6-3 6-3-in Spain player Pablo Carreno Busta a hneh ve bawk.

Kum 34 mi Djokovic hian vawiin bronze medal match-ah Carreno Busta a hmachhawn leh dawn a, Beijing 2008-a bronze lo awrh tawh Serb hian Olympic-ah bronze medal aia sang a la hlawhchhuak ngai lo.

Kumin March thla khan Djokovic hian world number one ni rei ber all-time record a siam a, Wimbledon title paruk a lak tlin rualin Roger Federer leh Rafael Nadal-te hnungzuiin Grand Slam title 20 a la tling ve tawh bawk.

Kumin hian Wimbledon title bakah Australian leh French Open title a la fel tawh bawk.

Tennis player zingah German nu rothap Steffi Graf chiah kha kum khat chhunga Grand Slam title pali leh Olympic title la kawp thei awmchhun niin, kum 1988 khan ‘Golden Slam’ a lo hlawhchhuak tawh a, Djokovic hian Steffi Graf hnungzui ve tumin Tokyo a pan a, German tlangvalin a beiseina a chhahsak ta a ni.

Zverev chuan Djokovic-a record um mek a hriatpui thu leh a ban phak tak loh avanga a uipui thu sawi chungin thil zawng zawng erawh a hui vek theih bik loh thu a tarlang tel.

Mipa tennis-a superstar rual an chuai huna an aiawhtu tura hual zinga mi Zverev hian kum 2018 khan London-a ATP Finals-ah Djokovic hi a lo barakhaih tawh bawk a; a career-ah Grand Slam final vawikhat chauh la khelin, nikum US Open final-ah Dominic Thiem a ngam lo.

Kum 2000 Sydney Games-a silver medal awrhtu Tommy Haas hnu lamah Zverev hi German zinga Olympic tennis final lut leh thei hmasaber a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy