Djokovic-a lalram a zau belh

Keini huna Thawhtan zing lam khan US Open 2023 mipa final khelh a ni a. Inkhelh hmuhnawm takah Novak Djokovic chuan set hloh lovin Daniil Medvedev a hneh a, ropui takin a champion. US Open-ah a champion leh tak vangin Tennis-a Djokovic lal ram a zau belh a, Grand Slam-a champion ngun ber Margaret Court champion zat a tluk bakah US Open-a champion thei upa ber record a siam nghal bawk.
Grand Slam-ah vawi 23 champion tawh Novak Djokovic hian semi-final-ah inelna neih meka chetha tak, USA innghahna lian Ben Shelton chu set hloh lova hnehin final a lut a. Final-ah kum 2021-a a ngam loh Daniil Medvedev a hmachhawn zui leh. Final-a a khingpui Medvedev hi champion lai Carlos Alcaraz vaw tlatu a ni a, Hart Court-a chetha tak a nih bawk vangin Djokovic hneh nawn leh turin rin a kai hle. 2021 final-a a lo hneh tawh Djokovic hneh nawn leh ngei tumin inlan bawk mah se Serb in phuba a la a, set hloh lovin a chak ve ta thung.
Final ngaihven hlawh takah player ngaihven hlawh Djokovic-a’n tha zetin bul a tan. Awlsam taka game hmasa ber a lak hnuin break a nei zui nghal zat a, set khatnaah 3-0 in hma a hruai nghal der. Medvedev hian break let tum viau mah se a hlawhtling zo lova, game thum chiah hloh chungin Djokovic-a’n set khatna chu awlsam takin a la phawt.
Beisei aia hmaah set khatna chin fel ni mah se set hnihna chu beisei aia harah a tawp ve ta thung a. Set hnihna la turin darkar khat leh minute 44 zet an mamawh. Break neih tumin tan khawh chiam thin mah se an hlawhtling zo lo ve ve a, game an inlak chhawk zak zak. Medvedev service a that chhoh laiin Djokovic service a tha lo chho a, double fault a nei chho tan. A serve a that loh vangin a serve a hum zo lo teuh thei hle a, dinhmun derthawngah a ding hman zak zak thin. Medvedev-a’n break a neih theih bik loh vangin Nole hian harsa takin a serve a hum hram hram zel a, tie-break a thlenpui thei ta nge nge. Tie-break-ah Medvedev chu bul tan tha zawk a ni a, 3-1 in hma a hruai hman. Dinhmun chhe zawkah a din laiin Djokovic huaisenna leh ropuina a lang nawn leh. Huai taka a khingpui beiletin set point a hmuh hmasak ber chu a takah a changtir nghal a, set hnihna a la.
Champion tura rinkai zawk leh tlo zawk tura ngaih Djokovic-a’n set hnih a lak zawn vangin champion tur a rin thiam kuarh tawh a, Medvedev hi khel chhe hran lo viau mah se inlehthalna thlentir tur em chuan beisei ngam a har. Tihsual ngah zawk leh long rally-ah tlo lo zawk a nih zel bawk vangin Serb hi champion ngei tura ngaih a ni a, amah tantute an phur viau tawh.
Set hnih a lak zawn hnuin Djokovic hian set thumnaah tha takin bul a tan leh zat a, set thumna tir lamah break a nei nghal. Break neiin, 4-1 a hmahruai theihna remchang nei bawk mah se ho tak taka tisualin a serve a hum zo lo nghal thung a, a hun tha neih a hloh. A serve a hum zawh loh hnuin break a nei nawn leh a, 4-2 a hmahruaiin a dinhmun a siam tha leh tho thung. Break a neih hnuin a serve a hum zawn a, game thum hloh chungin set a la leh ta nge nge. Final ngaihven hlawh tak chu a tawp a, 6-3, 7-6 (7-4), 6-3 a hnehna changin, Djokovic a champion ta a ni.
US Open-ah a vawi li nan a champion vangin Djokovic hi mipa leh hmeichhe zingah Grand Slam-a champion ngun ber Margaret Court record a nih rual a, Grand Slam-ah a vawi 24 nan a champion. Margaret Court-i record a nihrual lai hian mipa lama champion ngun ber a nihna a tihzau belh thung a. Amah hnaih bertu Rafael Nadal aiin Grand Slam-ah vawihnihin a champion tam zawk. Kum hnih khat tal chu tha taka inlan zui thei tura ngaih a nih vangin Djokovic hian Grand Slam a lak belh ngei a rinawm.
US Open semi-final a luh khan Nole hian Grand Slam semi-final vawi 47 a luhna niin, Grand Slam-a semi-final lut ngun ber record a lo siam tawh a. Ben Shelton hnehna final a luh khan Grand Slam final a luh vawi 36 na a ni a, Grand Slam final khelh ngun ber record a lo siam tawh a tihzau belh. Final hmuhnawm takah set hloh lova Daniil Medvedev a hneh khan US Open-a champion thei upa ber niin, US Open-a champion thei upa ber record thar a siam nghal bawk. Kum 36 mi Novak Djokovic hian US Open-ah kum 35 mi ni chunga kum 1970 a champion Ken Rosewall record a khum. Ken Rosewall hi Grand Slam-a champion thei upa ber a ni a ni zui rih thung a. Australian Open 1972-ah kum 37 leh ni 62-a upa ni chunga a champion record a la hum thei zel rih a. He record khum thei hnaivai chu Novak Djokovic bawk hi a ni.
US Open first round-ah a chak chiah khan Novak Djokovic hian World No. 1 thar ni tura point a mamawh a hmu nghal a, a champion zui tak hial vangin ATP Ranking tharah Djokovic hi a san fal phah leh zual. ATP Ranking thar hi Thawhtanni khan tihchhuah a ni a, Djokovic a luah lan tak Carlos Alcaraz chu point 3260 zetin a tlan pel. 2022-ah US Open a hmachhawn theih loh vangin Djokovic hian US Open 2023-ah a chak apiangin ranking point a hmuh belh a. A champion tak hial vangin point 2000 lai a hmuh belh. US Open tan hmaa Cincinatti Open-ah a lo champion tawh bawk vangin inelna hnuhnung pahnihah point 3000 lai a hmuh belh a, fal takin World No. 1 a nih leh theih phah.
Djokovic-a’n ranking point a hmun belh thur thur laiin Carlos Alcaraz erawh chu a point a kiam ve duai thung. Alcaraz hi kum hmasa lama a champion na Toronto Open-ah semi-final a luh zawh loh vangin ranking point a neih mek a hum zo lova, paih thensak a ngai. A champion na bawk US Open 2023-ah final a lut zo lo leh a, point 2000 a hum zo lo leh. US Open semi-final-ah a tlak vangin Alcaraz hian point 2000 a hum a ngaih laiin point 720 chiah a hum zo a. Ranking point a neih mek atangin point 1280 ngawt paih thensak a ngai. Alcaraz point paihsak a nih vangin Djokovic nen an inkar a zau phah ta duai a ni.
Kum 2023 chhungin inelna lian a tam tawh lova, Novak Djokovic tan No. 1 ni chunga kum khar theihna kawngka zau takin a inhawng. Point 1000 hmuh theihna Nitto ATP Finals-ah Djokovic hi champion lai a ni a, he inelnaah hian a champion nawn thei lo a nih chuan a point paihsak ve a ngai dawn. ATP Finals bakah hian point 500 hmuh theihna Astana Open leh point 250 hmuh theihna Tel Aviv Watergen Open-ah Djokovic hi champion lai a ni mek bawk a. Point humhim a mamawh bik hi point 1750 a ni. A point khawl sa humhim thei vek lo pawh ni se kum hmasa lam khan inelna hmachhawn theih loh a nei nual a, inelna dangah point hmuh belh theihna hun remchang a nei ve thung. Heti hi a nih vangin Djokovic hian No. 1 ni chung ngeia kum khar theihna remchang a nei.
Serbian pa huaisen Novak Djokovic hian No. 1 ni chungin vawi sarih ngawt kum a lo khar tawh a, year end no 1 ni ngun ber a ni. Hei bakah hian chawlhkar 389 chhung zet No. 1 niin, No. 1 ni rei ber a ni mek bawk a. Chawlhkar eng emzaw ti chhung chu No. 1 a ni zui leh ngei dawn bawk a, Tennis-a a record a tihzau belh deuh deuh dawn tihna a ni.
Tennis-a a lal ram zauh thar leh zual Djokovic chuan chawlh rilruk rum rum chang a neih ve thin thu a sawi a. “Heti chen hi ka thleng tawh a, engnge maw ka mamawh belh fo le tia inzawh chang ka nei ve thin”, a ti a, a chawlh hun tur em chu a la puang lo thung. Tennis-a Big Three – Roger Federer, Rafael Nadal leh Novak Djokovic te hun a her liam mek. Ngainat hlawh ber Federer a chawl tawh a, hliam in a tihbuai mek Nadal pawhin 2024-a chawlh a rilruk thu a lo sawi thuak thuak tawh. |angthar player tha tak tak lo chhuak zel karah Djokovic pawhin an her a her liam tan a, chhuan thar hun a intan ve tak chu Holger Rune a hneh loh hnuin a sawi ve bawk. Chuti a nih chuan tun ai hian tlahniamin, chuai ta hret se Djokovic hi a chawl har dawn lo tihna a ni. Tunah rih chuan tlang sang berah a chuang rih mek thung a, hei hian kum khat tal chu a la chelh a beiseiawm.
A kum tamin, uiathla lam ni ve tawh ngei mah se Djokovic erawh a danglam a, a chung berah a awm thei tho thin. Carlos Alcaraz, Jannik Sinner, Ben Shelton, Holger Rune te boruak lian thar hluai mah se Djokovic boruak tihniam phak erawh an la tam lo a, Serbian pa huaisen hi a thiam tulh tulh emaw tih tur a la ni ta cheu. US Open a zawh meuh chuan ‘Djokovic nge nge” tih a ngai leh ta. Tennis khawvela mi bik Djokovic khel kan en thin hi nakina vannei kan intihna tur leh kan la insawi theih vena tur a nih a rinawm.