US Open inbuatsaihna tournament lian khelh mek Miami Open lamah Italian world number two Jannik Sinner chuan nimin khan Frenchman Corentin Moutet laka 6-1 6-4 hnehna sualchhuak chungin ATP Masters 1000 event bika kum 10 chhung teh meuh set la zawn rei ber nihna lo hauh tawh Novak Djokovic-a record a lehpel ta a ni.
Kum 24 mi Sinner hian Grand Slam hnuai chiaha he sport-a inelna level sang berah hian straight sets tum 26 a la zawn tling ta a, a opening match-a Damir Dzumhur a hneh tum khan 24-time major champion Djokovic-a record (24 straight sets) tluk tawhin, Moutet laka minute 71 lek chhunga hnehna changin record thar a siam a; inkhelh banah a hlim em em thu leh tennis game chu sawilawk theih loh game a nih thu a sawi.
Four-time Grand Slam winner Sinner hi Masters 1000 tournament hnuhnung pahnihah a champion a, pakhat chu tunthla tir lam Indian Wells kha niin, nikum November thla Paris-a a title hlawhchhuah nen he tournament pahnihah hian set a hloh lo ve ve a ni.
Italian world number one hlui Sinner hian he tournament kal laia tla hma tak world number one Carlos Alcaraz nen ranking-a an inthlauhna pawtzim turin hun tha a nei leh mek a, last 16 lamah American Alex Michelsen a tum leh dawn a ni.
Sinner hi American tournament lian pahnih Indian Wells leh Miami Open-a champion kawpte sawina ‘Sunshine Double’ ni thei turin hun thain a hmuak mek bawk.
Tun tournament-ah hian a champion a nih chuan Roger Federer hnu lama mipate zingah kum 2017 hnu lama ‘Sunshine Double’ leh thei hmasaber a ni ang.
Last-32 stage inkhel dangah tunhnaia khelh zawh tak Indian Wells lama Alcaraz hnawtchhuaktu world number one hlui Daniil Medvedev chu Argentine Francisco Cerundolo chuan 6-0 4-6 7-5-in a hneh.
Djokovic-a Masters 1000 record khumtu Sinner
