Site icon The Aizawl Post

Djokovic a chak zel

Australian Open 2023 khelh chhunzawm zel a ni a. Nilaini khan vawikua champion tawh Novak Djokovic chuan second round-a a khingpui Enzo Couacaud hnehin third round a lut. Djokovic hi Australia rama inelna a hmahchawn hnuhnung vawi 35 zet a chak zawn tawh. Awlsam taka Djokovic a chak lai hian champion tura rinkai pahnih Casper Ruud leh Alexander Zverev te chu third round lut zo lovin an tla thung.
Djokovic a paukhauh nawn leh
Australian Open 2023 ah dam chiang lo chunga inlan Novak Djokovic-a’n second round ah a paukhauhzia a lantir nawn leh a, Couacaud a hmachhawn tumin medical time-out lak ngai mahse a beidawng duh chuang lova, harsa lutuk lovin hnehna an chang zui ta bawk.
Grand Slam a vawi 21 champion tawh Djokovic hian Couacaud lakah bul a tan tha viau a, set khatnaah game khat chiah hloh chungin set a la. Set hnihnaah Couacaud a khel tha ta viau thung a, game an inlakchhawk zak zak. Set hnihnaah hian 5-5 a nih laiin Djokovic hian break theihna hun tha nei mahse a chhawr tangkai zo lo. Serb hian tie-break ah hmahruai bawk mahse a hum zo lo va, a khingpui hian pawtthla in, set a hloh ve ta thung.
Hliamin a tihbuai bakah set khat a hloh bawk vangin Djokovic lakah rinhlelhna lian tak a awm hman a, a khingpui Couacaud ngei pawh a phur hman viau. Mahse, a laka rinhlelhna zawng zawng chu Djokovic hian thliin tiuchhum a lenbo ang hlauhin a rawn chhem kiang ta tlat thung.

Set thumnaah tha zetin Djokovic hian bul a tan a, break a neih nghal chhawr tangkaiin 3-0 in hma an hruai a. A khingpui hian beihlet tum viau mahse Djokovic phur laklawh lakah a khel hleithei meuh tawh lova, set thumnaah game hnih bak a la thei lova, set a hloh chiang hle.

Set thumnaah Djokovic a khel tha zual sauh a, a khingpui serve zawng zawng a break fai ta vek a. Awlsam taka set a lak zui leh nen hian Enzo Couacaud chu 6-1 6-7 (5-7) 6-2 in a hneh a, third round a lut. Australian Open ah a vawi 10 nan champion tumin Djokovic hian hma lam a pan hret hret zel a. Final hmaa a tum theih tur player tha pahnih ngawt an tlak vangin a kawng a awlsam phah leh zual tura ngaih a ni a. Final lut turin rin a kai sawt hle.

Ruud leh Zverev out
Second round ah awlsam taka Novak Djokovic a chak lai hian champion tura rinkai zinga mi Casper Ruud leh Alexander Zverev te chu second round lut zo lovin an tla thung. Seed No. 1 Nadal a tlak hnuin seed no 2 Ruud a tla zui ve leh a. Mipa lamah rinkai an tla zawn.

Kum 2022 a khel tha, Grand Slam pahniha final lut Casper Ruud hian second round ah World No 39 Jenson Brooksby a hmachhawn a. Awlsam taka chak thei tura ngaih a nih laiin mak tak maiin tlawm zawkah a tang ta tlat thung. A vawikhat nan Grand Slam ah champion a, a vawikhat nan vek World No. 1 ni thei dinhmuna ding Ruud hian a hun tha neih a hloh nawn leh a, 6-3 7-5 6-7 (4-7) 6-2 in Jenson Brooksby a hneh lo.

Ruud ang tho hian champion tura rinkai zinga mi Alexander Zverev pawhin second a paltlang zo bik lova, vannei taka Australian Open khel tur tling hram Michael Mmoh a hneh lo ringawt. Zverev hian Mmoh lakah set a la hmasa mahse 6-7 (1-7) 6-4 6-3 6-2 in a tlawm.

Exit mobile version