Daily Newspaper

Djokovic-a’n hma lam a pan zel

4

Tokyo Olympic-ah Tennis inelna neih chhunzawm a ni a. Mipa lamah champion tura rinkai ber Novak Djo-kovic a chak zel a, set hloh lova hnehna chang in quarter-final a in hlangkai. A thlengtu bra-nch Japan aiawha inlan Kei Nishikori nen semi-final luh an inchuhzui leh ang.

World No. 1 Djokovic hian nilaini khan Spain aiawha inlan Alejandro Davidovich Fokina a hmachhawn a, harsatna tawk lovin hnehna a chang. A practice pui thin Fokina lakah hian tha takin bul a tan a, set khatnaah game thum chiah a hloh a, set a la. Set hnihnaah tha zual zawkin a inlan a, game khat bak a hloh duh lo. Tichuan, 6-3, 6-1 hnehna changin quarter-final a inhlangkai. Djokovic hian Nishikori a hmachhawn zui leh dawn.

A thlengtu Japan aiawha inlan Kei Nishikori hian last 16-ah Belarus aiawha inlan Ilya Ivashka a hmachhawn a, set hloh lovin hnehna a chang. Set khatnaah Nishikori leh Ivashka te hi an inhnehtawk hle a, tie-break khelh a ngai nghal pang. Tie-break-ah Nishikori a chetha zawk a, set khatna a la. Set hnihnaah tualchhung tlangval Nishikori a chetha ta hle thung a, game zawng zawng a la fai vek a, game hloh nei lovin a chak a, 7-6(7) 6-0 a hnehna changin quarter final a inhlangkai. Quarter-final-ah khingpui hautak tak a neih a ngai dawn thung a. Champion tura rinkai ber Novak Djokovic hmachhawn in, fiahna hautak a hmachhawn a ngai dawn.

Quarter-final-a inhmachhawn tur Djokovic leh Nishikori te hi vawi 18 an lo inhmachhawn tawh a, vawi 16 zet chak tawhin Djokovic a chungnung zawk viau a. Japan tlangval hian vawihnih chiah hnehna a la chang. US Open 2014 khan Nishikori hian Djokovic hi a hneh nawlh a, hemi hnu hian vawi 16 zet an inhmachhawn leh tawh a, Serb hi a chak zawn ta zat zat thung.

Grand Slam-ah vawi 20 zet champion tawh Djokovic hian ropui chungchuang ni turin hma lam a pan mek. A vawikhat nan Olympic-ah a champion a, US Open-ah a champion leh thei a nih chuan Open Era-ah mipa zinga Golden Slam puitlin thei hmasa ber a ni thei dawn a ni.

Medvedev a chak hram
Nilaini khan champion tura rinkai pahnihna Daniil Medvedev chuan Italy aiawha inlan Fabio Fognini a hmachhawn a, set khat hloh chungin hnehna a chang.

Khawlum leh boruak uap tak hnuaiah Medvedev hian thawk lamah harsatna a tawk a, hreawm ti tak chungin inkhel a hmachhawn tluan thei hram. Fognini lakah hian tha takin bul a tan a, game hnih chiah hlohin set khatna a la. Set hnihnaah Italian Fognini a er let a, game thum hlohin set a la ve thung. Deciding set-ah Medvedev a chetha zui leh a, game hnih chiah hlohin set la zui leh a, 6-2 3-6 6-2 a hnehna changin quarter-final a inhlangkai. Medvedev rual hian champion tura rinkai zinga mi Tsitsipas pawhin quarter-final a lut ve bawk.

Khawlum leh uap tak chuan Tennis player te lakah harsatna a thlen zui zel. World No. 2 Medvedev hian thawk lamah harsatna a tawk a. Hnehna a chan hram hnuin, “Ka inkhel tluan thei hram a, mahse,,,ka thi thelh chu a ni e. Lo thi ta ni ia tu in nge mawhphur ang?, tiin Chair umpire Carlos Ramos a zawt. Nilaini hian tennis star Paula Badosa chuan khawlum a tuar zo ngang lova, wheelchair-a nawrchhuah ngai khawpin a awm.

Novak Djokovic leh Daniil Medvedev te chuan Tennis khelh hun chungchang hi ngaihtuah tha leh turin rawtna an lo siam tawh a. Chhun laia inkhelh chu khawlum uap tak hnuaiah chuan harsa tak a nih thu kar kalta khan an sawi a. Zana khelh an rawt nghal bawk. He rawtna hi Olympic thuneitu lamin an bengkhawn vak lo niin a lang a, a hun pangngaiah an la khel zel rih. Khawlum tuar lo an awm tak zauh zauh vangin ngaihtuahna an sen thar nge nge erawh a rinawm ta thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy