Wimbledon 2025 khelh chhunzawm zel a ni a, thawhtan zan khan Novak Djokovic chuan hnehna changin, Wimbledon-a quarter-final luh tam lamah Roger Federer record a hnaih zel.Thawhtan zan hian Jannik Sinner pawhin hnehna a chang ve leh bawk.
Wimbledon-a vawi sarih champion tawh Novak Djokovic hian last 16-ah Austrlian Alex de Minaur a hmachhawn. Nole hian bul tan chhe viau mah se thiamna ril nei leh tlo bik a nihna a lantir nawn leh a, hnehna hautak a sualchhuak nawn leh.
Champion tura rinkai parukna Djokovic hian bul a tan chhe tak zet a, game khatnaah a serve a hum zo lo nghal ringawt. A khingpui break let tum viau mah se a hlawhtling zo lova, Minaur hian break a nei leh ta zawk. Nole hian set khatnaah game khat bak a la thei lova, set hmasa berah a tlawm chiang hle.
Bul tan chhe viau mah se Djokovic a insiamtha chho a, inkhel hmuhnawm tak an lantir. Rei tak tak ball an inpek kual hnuin Djokovic hi vannei zawkah a tang a, break pawimawh tak a nei a, game li hloh chungin set hnihna a la. Set a lak hnuin set thumna leh set linaah pawh hun pawimawh laiin a che fuh leh hlauh thin a, break pawimawh tak a neih hmangin set a la zawn leh ta mai a. Khel tha tak Alex de Minaur lakah hian 1-6, 6-4, 6-4, 6-4 a hnehna changin quarter-final a lut ta a ni.
Grand Slam-ah vawi 24 champion tawh Djokovic hian Wimbledon-ah vawi 16 quarter-final a lut tawh a, he inelnaa champion ngun ber leh quarter-final lut ngun ber Roger Federer record a hnaih zel a, vawi hnihin a la tluk lo. Wimbledon ah a vawi riat nan champion tuma tan khawh Djokovic hian quarter-final-ah amah ngaisang em emtu Flavio Coboli a hmachhawn zui leh dawn. A idol hmachhawn zui leh tur Coboli hian last 16-a a khingpui Marin Cilic chu 6-4, 6-4, 6-7 (5-7) leh 7-6 (7-3) in a hneh a, a vawi khat nan quarter-final a lut ve bawk.
Thawhtan zana inkhel dangah champion tura rinkai ber Jannik Sinner chuan Grigor Dimitrov lakah harsa leh vanneih thlak ang reng takin hnehna a chang a, quarter-final a lut ve bawk. Dimitrov hian champion tura rinkai ber Sinner lakah a khel tha viau a, set hnih a la zawn. Set khatnaah break pawimawh tak a nei a, game thum chauh hloh chungin set a la. Set hnihnaah a khel tha zui viau a, break pawimawh tak a neih vangin set a la zui leh. Set hnih a la zawn a, set thumnaah pawh a khel tha chho leh viau a, 2-2 a ni leh mek. 6-3, 7-5 a hma a hruai a, set thumnaah 2-2 a nih bawk laiin hliamin Dimitrov hi a tibuai a, a inkhel zui thei lo. Quarer-final leh theihna hun tha tak a neih chu vanduaithlak takin a chhawr tangkai zo lova, last 16 paltlang zo lovin a tla zui ta a ni.
Dimitrov lakah vanneihthlak taka hnehna chang Jannik Sinner hian quarter-final-ah Bel Shelton a hmachhawn zui leh dawn. American Shelton hian last 16-a a khingpui Lorenzo Sonego laksh set khat hloh chungin hnehna a chang.
