French Open 2025 khelh mekah thawhtan zan khan Novak Djokovic chuan set hloh lovin Cameron Norrie a hneh a, Alexander Zverev hmachhawn turin quarter-final a lut. Inkhel dangah World No. 1 Jannik Sinner chuan hnehna changin quarter-final a lut ve bawk.
Rolan Garros-a vawi thum champion tawh Novak Djokovic hian inelna neih meka khel tha chho tak Cameron Norrie a hmachhawn a, last 16-ah fiahna a hmachhawn. First round-ah player langsar Daniil Medvedev vaw tla nghaltu Norrie lakah a khel tha viau a, set hloh lova hnehna changin quarter-final a lut a, Grand Slam-ah vawi 25 champion tlin tumin hma lam a pan zel.
Grand Slam-ah vawi 24 zet champion tling tawh Djokovic hian Cameron Norrie lakah a khel tha viau a, beisei lawk aia awlsamin hnehna a chang. Set khatnaah double break a nei a, game hnih chiah hloh chungin set a la. Set hnihnaah Norrie khel tha hret mah se a serve a hum zawh loh zeuh a tuar a, game thum bak la thei lovin a tlawm zui leh. Set hnih a lak zawn hnuin Nole hian set thumnaah break vawi hnih a nei leh ta mai a, French Open-ah vawi 100 a chak tlinna ni turin Norrie lakah hian 6-2, 6-3, 6-2 in hnehna changin quarter-final a inhlangkai. Quarter-final ah fiahna hautak zawk a hmachhawn zui leh dawn a, Australian Open 2025-a a hneh loh Alexander Zverev a hmachhawn zui leh dawn.
Djokovic laka fiahna hautak hmachhawn tur Alexander Zverev hian thawhtanni khan Tallon Griekspoor a hmachhawn a. 6-3 a set khatna a lak hnuin set hnihnaah 3-0 in hma a hruai leh mek a, a khingpui hi hliam vangin a inlan chhunzawm thei lova, awlsam taka hnehna changin quarter-final a lut zui ta a ni.
Quarter-final-a inhmachhawn tur Novak Djokovic leh Alexander Zverev te hi vawi 13 an inhmachhawn tawh a. Vawi 8 chakin Djokovic a chungnung zawk mek. Djokovic laka vawi 5 chak tawh Zverev hian an inkar tizim leh zual turin quarter-final ah hnehna chan ngei a tum ang. Anni pahnih hi an intum hnuhnung ber chu Australian Open 2025 – Semi-final-ah a ni. Hemi tum hian set khatnaah an inhnehtawk viau a, inkhel hmuhnawm tak an lantir. Tie-break-ah Zverev a chungnung a, set la hmasa zawkah a tang. Set khat an khelh zawh hnu hian hliam vangin Djokovic a inhnukdawk ta daih thung a, beisei phak lo takin an inkhel a tawp ringawt. A dam tha a nih ngat chuan Djokovic hian Zverev hneh ngei tumin thapui an thawh ngei ang.
Thawhtannia inkhel dangah World No. 1 Jannik Sinner chuan Andrey Rublev lakah set hloh lovin hnehna a chang a, quarter-final a lut ve bawk. Sinner hian inelna neih meka khel tha zet mai Alexander Bublik a hmachhawn zui leh dawn.
Sinner hian las 16-a a khingpui Rublev lakah a khel tha viau a, set khatnaah game khat chiah hlohin, awlsam zetin set a la. Set hnihna leh set thumnaah Rublev khel tha hret mah se set la tur khawpin a hmawr a bawk fuh tei lo. Grand Slam hnuhnung pathuma champion vek tum Sinner hian 6-1, 6-3, 6-4 in hnehna a chang.
Sinner a chak rual hian inelna neih meka chetha tak Alexander Bublik chuan inkhel hmuhnawm takah 5th seed Jack Draper chu 5-7, 6-3, 6-2, 6-4 in a hneh a, khel tha tluang zelin quarter-final a lut ve nawlh bawk. Sinner leh Bublib te hi vawi li an lo inhmachhawn tawh a, Sinner hian 3-1 in hma a hruai mek. Bublik-an Sinner a hneh ve chhun pawh hi hliam vanga Sinner-aa’n a khel tluan theih loh vang niin, atan inchhuanna tur leh chapopui tur viau a awm chuang lo.
Djokovic hmachhawn tur Alexander Zverev
