Daily Newspaper

Djokovic leh Medvedev-te’n inkhelh hun sawn rawt

13

Kum khat chhunga Olympic gold leh Grand Slam title pali la kim vekte chawimawina ‘Golden Slam’ uma Serbia ram tana Tokyo Olympic Games hmachhawn mek Novak Djo-kovic leh world number two Daniil Medvedev-te chuan Inrinnia Olympic bul an tanna singles match-ah hnehna chang ve vein, inkhelh banah khawlum lutuk chungchang an au-chhuahpui ve ve a, an career-a khawlum an tawn natber tum a nih thu sawichhuak ve ve chungin Olympic organiser-te chu tennis khelh hun siksawi turin an ngen zui nghal.

Serb Djokovic hian a first round match-ah Bolivia player Hugo Dellien chu 6-2 6-2-in a sawp a; Tokyo khaw lum lutuk avangin player-te tui tlachham (dehydrate) dinhmuna an din hial thu a sawi.

Kum 34 mi chuan, “A lum em avang leh boruak ipik churh avangin chet a harsa a, ngaihtuahna a bing mum mum a, ke a rit nulh a, hetiang dinhmun hi kan vawikhat tawnna ni lo mah se inthlakna pindan lamah chuan khawlum avanga chet hatsatber tum ni hialin ka sawi.

“ITF (International Tennis Federation) lamin match khelh hun an sawn loh chhan hi ka hre pha chiah lo a, tlai lam dar 3 vela kan khel tan lo kha a chhan awm-ang ka hre mai lo. Ti velah khan khel tan pawh ni ila darkar sarih vel inkhelhna hun kan la nei dawn tho a, court tinah light a awm vek bawk si,” a ti.

Kum 25 mi Medvedev pawhin Ariake Tennis Park lum vang lai tak, boruak lum dan tehnain 32C a kawh vuh laiin a first round match a khel a, 6-4 7-6 (10-8)-a Kazakhstan palyer Alexander Bublik a hneh hnuah khawlum a sawisel ve nghal a, Djokovic aiin inkhel tan hun a duh tlai a, zan dar 6-a khelh tan chauh a rawt bakah tanhmun inthlak lai hunawl second 90 ni tlangpui thin minute khat chauh an dah chu ‘fiamthu’ tiin a sawi.

Russian hian an inkhelh lai khawlum boruak kha a tawn tawha a la hrehawmber tumte zinga pakhat a nih thu a tarlang tel.

Hmeichhe lamah Medvedev-a chipui, kum 30 mi Anastasia Pavlyuchenkova phei chu ni sensat vanglaia khelmual a luh hnuah luhai luakchhuak avangin medical timeout a la hial a, vawr tlangin an dep mawlh mawlh a, 6-0 6-1-in Italian Sara Errani hneh bawk mah se inkhelh banah ni sa lutuk tawrh hrehawm a tih thu hahipin a sawi.

Games tan hnuah boruak lum lutuk chu Tokyo 2020-a mite titi tui ber pakhat niin, karliamta Zirtawpni khan Russian archer Svetlana Gomboeva phei chu qualifying competition a hmachhawn laiin a thidang hial a; khawchhak thlipui typhoon inmung avangin lawngkar (rowing) hun pawh siksawi a ni.

Tokyo leh a chhehvel boruak hian mi zawng zawng a tilunghnur bik lo a, tuifawna tleng intihsiaktu surfer-te tan chuan thlipui leh boruak avanga tuifawn chak leh sang chu hamthatna thlentu a ni ve thei a, nimin khan intihsiak tan a ni.

Kum 1964 daih tawha Tokyo khuain Olympic Games a thlen hmasak tum kha chuan boruak lum lutuk tur pumpelh turin Summer Games kha favangah an sawn a, kuminah erawh Japan ram nipui sensat vanglai takin Olympic an dawl a, khaw lum lutuk avang hian marathon leh race-walking event-te chu khawpui dai deuh zawk Sapporo lamah an sawn a; hei lo pawh hi Games organiser lam chuan boruak lum beih-letna’n ruahmanna an chhawp-chhuak neuh neuh reng a, Olympic sakawrte phuh huh seng sengta tur (mist-spraying station) an dian nual a, referee-te thuam hak tur vawt chu (cooling vest)-te duangchhuakin, infiammite pawh uluk taka an dinhmun vil reng a ni.

Karliamta tir lam khan a zir mite chuan Tokyo lumna leh boruak hnawng pik churh bawk si chu inelna hmachhawn tur tana a buaithlak phak tur thu an lo sawilawk tawh a, Japanese Environment Agency pawhin khawlum na lutuk tur hi puanglawkin, mipuite pawh pawn chhuak tam lo turin thurawn an pe hial.

Inelna an han tan a, tennis player-te’n tawrh har an tih thu leh match khelh hun sawn an duh hial thu an auchhuahpui a, IOC lam pawhin thuchhuah siamin, player-te hriselna an ngaihpawimawhber thu leh hripui avanga tualchhun lamin inkhuahkhrihna khauh tak an kalpui bawk si avangin chawhma dar 11-a tennis inelna kalpui mai a ngaih thu an sawi a, ruah an beisei mek chuan khawlum lutuk pawh a tihziaawm ngei an beisei thu an tarlang tel.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy