Daily Newspaper

Djokovic, Nadal, Thiem tlang

41

Karliamta kartawp khan French Open mipa singles title hawn thei tura rinkai zinga mi world number one Novak Djokovic, defending champion Rafael Nadal leh Roland Garros final hnuhnung pahniha Nadal ngam loa tlawm Dominic Thiem-te’n round sang zawk an lut.

Kum 33 mi Djokovic chuan a Grand Slam title 18-na tur a beisei mekna kawngah 6-0 6-3 6-2-a Colombian qualifier Daniel Elahi Galan sawpin fourth round a lut a, quarter-final luh inchuh match pakhatah 15th seed Karen Khachanov of Russia a tum leh ang.

Serb Djokovic tan tuntum hi a zawna kum 11 chhung tehreng French Open last 16 a luhna ni tawh mah se Paris tournament lianah hian tumhnih chiah a la champion zo a, world number 153 lakah nuamsain hnehna chang bawk mah se 2016 champion hian a tiatpui leh he leilunga thiamna bik nei a hmachhawn hunah eng dinhmun chiah nge a luah dawn sawi theih a la ni lo.

Fourth round lama a tum leh tur Khachanov pawh hi third round-a awlsam taka a paltlang Galan ai ngawt kha chuan khawng zawk tura ngaih a ni a, kumhnih kalta Paris Masters final-a a hneh loh tawh kha a ni.

Khachanov hian last 16 lut turin 20th seed Christian Garin of Chile lakah 6-2 3-6 6-4 6-2 hnehna a chang ve bawk.

Third round match dangah claycourt master Rafael Nadal chuan Italy player Stefano Travaglia lakah lainatna chhete mah lantir loin 6-1, 6-4, 6-0 hnehna nen a sawp zal a, Roland Garros-a champion ngunber hian a record pawhsei tumin a title 13-na tur a beisei leh mekna kawngah a hm^a dingte dimdawina a nei lo tluang zel.

Second seed Nadal hian Grand Slam mipa singles title la hnember ni mek Roger Federer-a kuta title 20 awm tluk turin vawikhat champion a la ngai a, chu chu Paris-ah hian a beisei m>k a, hripui chhuanlamin US Open lamah pawh a inlan duh lo a, harhvang vek vawkin tuntum pawh hian a inlan chho ta mek reng a, last 16 match-ah American Sebastian Korda a hmachhawn leh dawn a ni.

Austria star Dominic Thiem pawhin 28th seed Casper Rudd lakah harsatna lian tawk loin 6-4, 6-3, 6-1 hnehna nen fourth round a lut a, French Open champion hlui Stan Wawrinka vawtlatu tualchhung tlangval dehkhirh Hugo Gaston lakah fiahna lian zawk a hmachhawn leh ang.

Third seed Thiem hi US Open khelh zawh taka champion kha niin, Roland Garros-ah grand slam title dang a beisei chhunzawm leh mek a ni.

Kum 21 mi 28th seed Ruud khan Rome leh Hamburg lama semi-final a luh hnuah inrintawkna thuk zawk nen Paris a pan a, Norwegian player zinga Grand Slam fourth round lut thei pahnihna nih a tum chu a puitlin zo ta lo a ni. A pa Christian Ruud khan 1997 Australian Open last 16 a lo khel ve tawh a, a pa hnung a zui zo ta rih lo a ni.

French Open third round match danga Wawrinka tlawm thu luhchilh leh lawk ila; Swiss hi beisei loh takin wildcard Hugo Gaston chuan 2-6, 6-3, 6-3, 4-6, 6-0-in a vawtla a, French pate reuh te, metre 1.73 leka s^ng hi main draw-a French mipa 18 inlan zinga dam awmchhun a ni tawh a, Grand Slam-a vawithum champion tawh a hnawtchhuak thei hian a chipuite lawm a hlawh hle a ni.

Inkhel dangah qualifier Daniel Altmaier chuan rin loh takin seventh seed Matteo Berrettini lakah straight-set hnehna changin, German world number 186 hi hliamin a tihbuai hnua Grand Slam main draw a thlen leh vawikhatna niin, Italian lakah 6-2 7-6 (7-5) 6-4 hnehna a sualchhuak a, qualifier zinga kumkaw chhunga French Open last 16 lut leh thei hmasa ber Sebastian Korda hnung a zuilut a, 17th seed Pablo Carreno Busta nen an inkhel leh ang.

Kum 22 mi Greek fifth seed Stefanos Tsitsipas chuan hahdam zawkin round three a paltlang a, 6-1 6-2 3-1-a hma a hruai laiin a tumpui Slovenian Aljaz Bedene chu kheimit hliam avangin a inhnukdawk a, Grigor Dimitrov a tum leh dawn a ni.

Bulgarian 18th seed Dimitrov pawh hi set khelh tluan ngai loa tlang ve bawk niin, 6-1 6-3-a hma a hruai laiin a elpui Roberto Carballes Baena chu hliam avangin a inhn<kdawk a, set hnih chiah khelin a tlang.

Russian 13th seed Andrey Rublev pawhin Kevin Anderson hnehin a vawikhatna’n French Open fourth round a lut a, South African laka 6-3 6-2 6-3 hnehna a sualchhuaktu Rublev hi Marton Fucsovics nen quarter-final luh inchuhin an insu leh ang.

Third round inkhel dangah Hungarian Fucsovics pawhin Brazilian Thiago Monteiro lakah 7-5 6-1 6-3 hnehna a chang ve bawk.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy