Daily Newspaper

Djokovic tan medal a hmin

12

Tokyo Olympic neih mekah nimin khan Tennis inelna neih chhunzawm a ni a, champion tura rinkai ber Novak Djokovic chuan a a thlengtu Japan aiawha inlan Kei Nishikori a sawp a, semi-final a lut. Djokovic hian a chhe berah pawh Bronze medal a hlawhchhuak tawh ngei dawn. Hetihlai hian No. 2 Daniil Medvedev chuan quarter-final a paltlang zo lo thung.

Champion tura rinkai ber, Gold Medal awrh chaka tuihal Novak Djokovic hian Japan tlangval Nishikori lakah a khel tha tak zet a, set hnih an khelh chhungin game khat chiah a hloh. Serb hian set khatnaah tha zetin bul a tan a, game hnih chiah hlohin set hmasa a la. Set hnihnaah tha zual zawkin a inlan a, a khingpui hi a sawp ta hle a; game hloh nei miah lo vin set a la zui leh. Tichuan, 6-2, 6-0 a hnehna changin semi-final a lut. Kum 2008 Beijing Olympic-ah khan Djokovic hian semi-final a lut a, Rafael Nadal hneh lovin final a lut zo lo va, Bronze medal a hlawhchhuak. Tokyo-ah hian champion ngei tumin hma lam a pan mek a, semi-final-ah world No. 5 Alexander Zverev a hmachhawn zui leh ang.

Germany aiawha inlan Zverev hian quarter-final-ah France aiawha inlan Jeremy Chardy a hmachhawn a, harsa taka hnehna changin semi-final a inhlangkai. Zverev leh Chardy te hi an inhnehtawk hle a, set hnih an khelh chhungin tie-break khelh a ngai ve ve a. German Zverev hi tie-break-ah vannei zawn in, chak zawkah a tang ta a ni. Semi-final-ah champion tura rinkai ber Novak Djokovic a hmachhawn a ngai dawn a, final lut turin fiahna hautak ber a paltlang a ngai dawn.

Semi-final-a inhmachhawn tur Novak Djokovic leh Alexander Zverev te hi vawiriat an inhmachhawn tawh a, vawiruk hnehna changin Djokoivic a chungnung zawk a. Zverev hian vawihnih hnehna a chang ve tawh thung. An intum hnuhnung pangaah Serb hi a chak zawn zat zat a, heng a chakna te hi Tokyo Olympic an khelhna ang indoor hard court angah hian a ni nghe nghe. Zeverev-a’n Djokovic a hneh hnuhnun ber tum chu kum 2018 kum tawpa Nitto ATP Finals-ah a ni a. Hemi tum hian Djokovic hi a inthlahdah nia ngaih a ni. Zverev lakah record tha tak a neih vangin Djokovic hian final a luh ngei a beiseiawm viau. Anni pahnih inkhela chak zawk zawk hian final-ah Pablo Carreno Busta/Karen Khachanov an hmachhawn dawn vangin champion theihna hun tha tak an neiha ngaih a ni.

Medvedev a tla
Mipa lamah champion tura rinkai zinga mi No 2 Daniil Medvedev chuan quarter-final-ah harsatna a tawk a. Spain aiawha inlan Pablo Carreno Busta lakah set khat pawh hlawhchhuak zo lovin a tla. Spaniar hian Russian lakah tha zetin bul a tan a, rin phak baka khel tha in, set khatnaah game hnih chiah hlohin set a la. Set hnihnaah Medvedev-a’n chak let a tum hle a, huai takin a khingpui a bei let. Game an inlan chhawk zak zak hnuin Carreno Busta hian 7-5 in set a la zui leh a, 6-2 7-6 (7-5) a chakin inlehthalna lian a thlentir. Medvedev lehthaltu Pablo Carreno Busta hian Karen Khachanov a hmachhawn zui leh ang.

Khachanov hian quarter-final-ah France aiawha inlan Ugo Humbert a hmachhawn a, inkhel hmuhnawm leh inhnehtawk takah 7-6 (7-4) 4-6 6-3 a hnehna changin semi-final a inhlangkai ve nawlh bawk. Olympic-ah medal a hlawhchhuak dawn ta a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy