Daily Newspaper

DM&R minister-in ala tlawh lo hi a mak – ex DM&R minister

37

Khawchhak tlangdunga lirnghing tuarte tun thlenga Disaster Management & Rehabilitation minister-in ala tlawh miah lo chu mak a tih he department changtu minister hlui C Ngunlianchunga chuan a sawi a. Che chhuak thuai turin a phut tih a sawi.

MLA C Ngunlianchunga hian tun kartir lama Mizoram khawchhak lama lirnghinna hmun khuate a tlawhnaah he thu hi a sawi a. Lirnghinna hmun tlawha kal minister Robert Romawia Royte-in a department chan Tourism hnuaia Zokhawthar-a Tourist Lodge, lirnghing vanga luah ngam loha awm phah a tlawh tel lo chu mak a tih thu a sawi a. DM&R minister Pu Lalchamliana’n khawchhak tlangdunga lirnghing tuartute a la tlawh miah lo phei hi mak lehzual a tih thu a sawi.

“Eng tih theih bik awm lo mah se, chhiatna liantham a lo thlenin DM&R minister nih chuan chhiatna thlenna hmun a rang thei ang bera thlen hi kan mawhphurhna a ni a. Sawrkar atanga tanpuina awm theite rang taka ngaihtuahpui a, a tul apiang ngaihtuahpui hian thlabar taka awm chhiatna tawkte an thlamuan phah ve thin,” tiin Congress sawrkara DM&R minister hian a sawi. Khawchhak tlangdung mipui lirnghing avanga thlabar leh ralkhel taka an awm lai leh thla pawh a liam tawh hnu thlengin DM&R minister-in vawikhat pawh mipui thlamuan tura ke a la pen chhuak lo nia sawiin, che chhuak thuai turin a ngenin a phut tih a sawi.

Tourism minister-in tunhnaia lirnghinna hmun khawchhak tlangdung khaw hrang hrang tlawh mah se, a department chan Tourism hnuaia Zokhawthar Tourist Lodge a tlawh lo pawh a awm lo hlea a hriat thu sawiin, “Intihlar tum nan a phawvuakah an cheng kual mai mai nge, mahni chanpual department hlamchhiahin hun an hmang mai em ni, tih hi ka zawhna a ni,” C Ngunlianchunga hian a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy