Site icon The Aizawl Post

Doctor 21-te awmna sawn/hna belh CYLA-in doctor sawnchhuah tum dodal

Mizoram sawrkar chuan a hnuaia medical doctor 21 awmna sawn leh hna chanpual pek belh a nei a. Sawnchhuah zing ami Lawngtlaia doctor chu a dang thlaktu tur an awm loh avangin sawnchhuak lo turin Central YLA chuan sawrkar a ngen.

Health & Family Welfare department chuan 2023 February 3 khan hriattirna tichhuakin, grade-I atanga grade-III inkar doctor 21 chu an awmna siksawi leh thenkhat an awmna atanga an chelhkhawp tur chanpual pekbelh a nei a. Heng zinga post thenkhat chu hna changtu awm lo (vacant post) luahna tur a ni.

Doctor sawn zing ami, District Hospital Lawngtlai atanga vacant post – Chhuarlung PHC-a sawn tum Dr Paul Lalchungnunga chu Central Young Lai Association chuan amah bak an neih loh avangin sawnchhuah sak lo turin Health minister an ngen.

CYLA thuchhuak chuan, doctor sawnchhuah tum hi Lawngtlai district puma ultrasound ti thei awmchhun a ni a, a hma in ultrasound ti thei doctor pakhat chu thlaktu awm loin sawrkarin a lo sawnsak tawh a, Dr Paul Lalchungnunga hi ala awm tho avangin ui tak chunga an thlahliam tawh laiin, tuna thlaktu tur dah loa an neihchhun sawnchhuah tum a ni chu district mipui tan inhremna ang hiala an ngaih thu an sawi.

‘Lawngtlai district hi Mizorama district hnufual ber zing ami kan ni a, hriselna lamah phei chuan district dang kan pha lo em em a. Lawngtlai district-ah hian district dang dangte nena khaikhinin doctor an tlem hle. Tun dinhmuna Lawngtlai district-a doctor awmte an tam tawk lo kan tih avanga sawrkar pawh vawi tam doctor dahbelh tura kan ngen lai a, thlaktu awm loa kan neih san min sawnsak hi kan ngaithiam lo hle a, doctor sawnchhuahna order hi min sutsak turin kan ngen che a ni,’ an thu thlen hian a ti.

Exit mobile version