Doctor hnena zêp loh chi

Doctor hnena zêp loh chi
Doctor hnena kan inentirin sawi hreh deuh tlat te kan nei thin. Mahse, doctor hnena thudik famkim lo emaw, kan awmdan leh nat dan te kan hrilh famkim loh chuan kan tan a pawi thei tlat. Chutiang bawkin doctor hnena sawi tur hriat te pawh a pawimawh hle a ni.
1. I vitamin ei emaw, ramhmul damdawi i ei emaw te kha doctor hnenah sawi ngei tur. Vitamin supplement te hian damdawi thenkhat hnathawh a tibuai ve thei a, chutiang ramhmul damdawi thenkhat pawhin damdawi hnathawh a tibuai thei. Entirnan, calcium hi hmeichhia ten ruh tihchak nan ei kan ching a, hengte hian antibiotics hnathawh a tibuai thei a ni.
2. Inthiar laia mawng atanga thi lo chhuak a awm te hian doctir hnena sawi kan hreh thin. Min zawh ngial pawhin hriat loh der tlat ching te pawh kan awm. Mahse, kan nun chhanhim nan a lo pawimawh thei tlat. Ek thi hi colorectal cancer vang te pawh a lo ni thei a, hriat chhuah hma chuan tihdam theih a ni. Chuvangin i inthiar thin dana danglamna (any change in bathroom habits) engpawh a awm a nih chuan doctor chu hrilh tur a ni a, rei tak i ek a khal a nih pawh doctor hrilh tur a ni.
3. Mipat hmeichhiatna lama harsatna kan neih chungchang sawi hi kan hreh hle a, doctor hnena sawi pawh nuam kan ti chuang lo. Mipat hmeichhiatna hman châkna kan nei ta mang lo te a nih chuan stress, anxiety, depression le anorexia vang te pawh a lo ni thei. Pre-menopausal symptoms thenkhat pawhin mipat hmeichhiatna lama harsatna te pawh a thlen thei a, entir nan- serh tuihnang awm lo (vaginal dryness).
4. Doctor chu i vawikhat rawnna a nih phei chuan i medical history hrilh ngei tur a ni, i naupan laia i tonsil zai (tonsillectomy) thlengin doctor chu hrilh tur a ni. Doctor chuan i natna leh a enkawl dan tur tha ber a hriat theih nan i background information a hriat a tul a ni.
5. Doctor hnenah chuan i chhungkhat laina hnai natna nasa deuh (major illness) nei an awm chuan hrilh tur, natna satliah lo deuh i lo neih tawh te, i inzai tawhna te leh tuna i awm dan te hrilh tur a ni.
6. Damdawi ei lai i neih chuan a hming ziak chhuaka doctor chu entir theih a tha, vitamin leh herbal supplement thlengin. Tin, damdawi ngeih loh zawng i neih te pawh doctor chu hrilh tur a ni.
7. Tunhnai deuhah X-ray emaw medical test emaw i nei a nih chuan a films emaw a result emaw ken tel theih a tha.
8. Na i neih dan te, a nat hun te, a natna lai te, nikhata a nat ngun dan te, a nat nasat dan te pawh doctor hnena i sawi theih chuan a tha hle ang.
9. Tunlaiah chuan internet atanga kan natdan hriat tuma mahni tawka hma lo lak ve te pawh kan ching ta, hei hi doctor ten pawi an ti vak lovang. Doctor tam zawk chuan mi vengva tak enkawl chu nuam an ti daih zawk ang. ‘Internet te ka lo en ve a, chutiang khatiang chu a ni a, an ti a, a dik reng em?” ti a doctor hnena sawi te pawh a pawi lo. mahse, hriatreng tur chu, internet atanga i chhiar chu a nawlpui thu a lak (general) a ni tih hria la, i case nen chuan a lo inang kher lo thei.
10. Kan ei leh in leh zuk leh hmuam kan chin dan te pawh sawi hreh tur a ni lo va, zu kan in ve zeuh zeuh a nih pawhin doctor chu hrilh tur a ni.
11. Doctor-in min chawh damdawi chu mahni thua tih tawp ve ngawt loh a tha. Doctor-in damdawi a chawh che chu i lo hrisel zawk nana tih a ni a, tuten emaw side effect a neih theih dan an sawi te i lo hria a nih pawhin mahni thu a tawpsan ngawt lovin doctor chu rawn tur a ni. Side effect kan sawi leh hriat tam zawk hi chu a thleng khat ve hle a nia. Damdawi chu i ngeih lo ni a i inhriat pawhin doctor chu hrilh leh hreh tur a ni lo.
12. I awmdan leh nat dan te nangman i sawi hreh emaw i sawithiam dawn lova i inhriat chuan midang kalpui mai pawh a pawi lovang.