Dolly Parton-i’n a hla phuah zinga tha a tihzual a thlang
Billboard magazine-in country star zinga ropui bera an thlan Dolly Parton chuan a hlaphuah tawh zinga tha a tih leh a duh zual pathum thlan chu thil harsa tak a nih thu sawiin, “A vaiin ka duh vek a,” a ti hmasa te te a, “Ka mimal nun nena inzawm bera ka hriat cu ‘Coat of Many Colors’ a ni a, a chhan chu ka nun leh ka chhungte chungchang a tarlang a. Inchhaih nawmnah leh mahni nihna pawm thlengin a huam a ni,” a ti.
Dolly Parton, kum 78, hian hla sang chuang a phuah tawh niin an sawi a, Billboard Hot Country Songs chart-a No.1 kai thei pawh hla 24 chuang a nei tawh a, chung zingah tha a tih leh a duhzual pathum a thlan zingah chuan Jolene pawh a tel.
Parton chuan, “Jolene hi record ngun ber a ni hial ang. Mite duh ber a ni tihna te pawh a ni mahna, He hla hi tun kum 52 chhung hian vawi 450 vel zet an record tawh niin min hrilh a. Ka chhuang ve khawp mai. A dang leh chu ‘I Will Always Love You’ kha a ni a, khawvela love song ropui ber te zingah a tel ve an ti a, hei pawh hi ka intihtheih pui ve khawp mai,” a ti bawk.
Parton hian a nu coat thui sak, puan them chi hrang hrang belkhawm school-a a hak avanga chhai nawmnah a tawh avangin ‘Coat of Many Colors’ hlaa hi a lo piang a, 1971-a a tihchhuah niin, Hot Country Songs chart-ah No.4 a kai a, ‘Jolene’ hla hi 1974-a a tihchhuah niin, he chart-ah hian No.1 kaiin, 2014 khan Grammy Hall of Fame-ah seng luh a ni.
‘I Will Always Love You’ pawh hi 1974-a a tihchhuah niin, Hot Country Songs chart-ah No.1 a kai a, 1982-ah ‘I Will Always Love You’ leh ‘Do I Ever Cross Your Mind’ te a No.1 pui leh bawk. 1995-a Vince Gill nen thawk dunin a duet version an tichhuak a, hei pawh hi chart No.1 a kaipui leh bawk. Chutah Whitney Houston-i’n ‘The Bodyguard’ soundtrack atan a rawn sa lar thar leh a, kar 14 chhung leh Billboard Hot 100 (singles) chart-ah a No.1 nghe nghe a ni.
Dolly Parton hian 1972 khan ‘Coat of Many Colors’ hla avangin Nashville Songwriters Association International chawimawina a dawng a, he hla hi Library of Congress-in National Recording Registry-ah 2012 khan an la lut a, 2019-ah Grammy Hall of Fame-ah an la lut tawh bawk.
Parton leh Gill te duet ‘I Will Always Love You’ hian CMA Awards-ah vocal event of the year a dawng a, 1996-ah Grammy nomination-ah best country vocal collaboration-ah langin, he hla avang hian Parton hian 1983 khan best female country vocal performance nomination a neih phah bawk. Whitney Houston-i’n ‘I Will Always Love You’ a record hi 1994 khan Grammy record of the year niin, Houston hian best pop vocal female performance a dawn phah bawk. “I Will Always Love You’ hla hi 2007 khan Grammy Hall of Fame-ah seng luh a ni tawh bawk.
Dolly Parton-i’n a hla phuah zinga \ha a tihzual a thlang
