National Commission for Women bultumin “Safety for domestic employees and other” tih thupui hmangin Mizoram State Commission for Women leh Women and Child Development Mizoram tangdun chuan Ningani khan Aizawlah India hmarchhak huap Regional Level Seminar an buatsaih. Assam, Arunachal Pradesh, Tripura, Nagaland leh Meghalaya atangin an State Women Commission aiawh an lokal bakah hmarchhak state engemawzat atangin state police officer an tel bawk.
A hawnna hmanpuitu Social Welfare minister Lalrinawma chuan hmeichhiate ram pawnah hna zawnga chhuah a tul ta fo a. A bikin damdawi ina nurse hna thawk turte, spa leh salon, house-maid leh hna hrang hrang thawk turin ramdang pan an tam tak avangin private placement agencies pawh an awm ta nual a. Ram pawna hna thawka chhuakte hi training an neih lai atanga harsatna leh buaina tawk, an thawhna hmuna harsatna tawk an awm nual thin a, an harsatna tawh hian mahni taksa zawrhna lam thlengin a hnuklut fo thin tih a sawi.
Hetiang dinhmun a thlen takah hian North East States chu tangrualin dan neihte tangkai zawk leh a nih dan tur ang taka hman a nih theihna’n hma la in, private placement agency-ten registration felfai tak an neih a, dan an zawm a, hemi lama thawkte pawh a hma aia chak zawka thuamthat an nih theih beiseiin seminar hi buatsaih a ni tih a sawi a ni.
Hmanah chuan hmeichhiate chu inah awmin, nau awm leh inchhung sekrek khawih chu an kutah a awm thin a, hun inthlak danglam zelah hmeichhe tam takin eizawngin nitina in an chhuahsan a ngaih takah chuan inchhung tihfai, eirawngbawl, nau awm leh a dangte ti tura midang rawih mamawhna a lo sang ta a. Hei hian thawh tur mamawh tam tak tan inhlawhna kawng siam phah mah se, hmun thenkhatah chuan dikna inrahbehsakna a awm thin tih minister hian sawiin, “Hei hi a pawi takzet a, ‘domestic worker’ te dikna leh zahawmna humhim a nih a, hemi kawnga harsatna sukiang tura zirhona buatsaih a ni hi a lawmawm hle a ni,” a ti.
Mizoram DGP Anil Shukla chuan India ram chhunga domestic worker-te dinhmun leh harsatna tawh hrang hrang a sawi a. A then chu a ruaituten hlawh an pek that loh, zingkar atanga zan rei tak tak inchhawr leh ei tur inpek that loh report a awm tih a sawi. Mizoramah pawh agency rintlak loh kaltlanga state pawn leh ram pawn thlenga hna tha leh hlawh tha tak tak an hmuh theihna tura thalai thlemchhuahte dinhmun khirh taka awm an awm tawh thu sawiin, Mizoram Police chuan heng case hi bawhzuiin thalai tam tak chhanchhuah an nih tawh a. Chutihrual chuan report loh tam tak a awm thei a, fimkhur tlan a pawimawh tih a sawi a ni.
Awmpuia inhlawh turte dikna hum tur chuan heng placement agency-te hi dan hnuaiah uluk taka endikna nen din a, worker-te pawh tha taka an thawh theihna’n an mamawh training pek a, an dinhmun enzui zel tha a tih thu a sawi bawk.
Women & Child Development director Zoramthangi Chhangte pawhin India chu a ram pum anga enin domestic worker-te dinhmun that lohna ram a ni, tiin, domestic worker-te dinhmun a that zawk theihna’n ngaihtuah sen a tul tih a sawi a ni.
Resource person hrang hrang – Aizawl SP Rex Zarzoliana’n ‘Human Trafficking in Mizoram’, Addl District & Sessions judge Aizawl Gracy L. Bawitlung chuan ‘Safety for Domestic Workers and other Employees : The Legal Framework’, MZU Prof. Lalhriatpuii’n ‘The Trajectory of Women Domestic Workers: An Economic Perspective’, MZU associate professor Dr Henry Zodinliana’n ‘Sexual Exploitation of Women and Girls in Mizoram’, FIWDC Peace Home director sister Ruth Zonunthari’n ‘Welfare of Domestic Workers’ tih te an sawi a. State hrang hrang atanga Women Commission aiawhte, police leh district administration lam atangin domestic employee kaihhnawiha report an dawn tawh leh hmalakna bakah thu pawimawh dang sawiho a ni.
Domestic worker-te dinhmun leh an himna NE huapin zirho
