Daily Newspaper

Donald Trump-a’n 2024 inthlanah chuh leh tum hmel

8

Joe Biden laka inthlana a chak loh thlakhat hnuah pawh Donald Trump chuan kum 2024-a US president ni tura a chuh leh theih thu a sawi a.

Trump chuan Biden laka a chakloh la pawm duh lo zelin a lawyer leh amah thlawptute chuan lawsuit an la thehlut reng a. Hei bakah hian martial law kalpui emaw inthlan that emaw a awm theih nan an la kherh a ni.

Trump chuan minute 46-a sei video a tihchhuahah inthlanah vote ‘tihchingpen’ hmanga a chakna chhuhsak a nih thu a sawi bawk a.

Mahse, Thawhlehni khan White House Christmas party neihnaah President chuan indona a hmachhawn mekah a chak loh mai theih thu sawiin mahse President term khat lek chelha duhtawk a tum loh thu a sawi thung.

“Kum li hun mak tak kan hmang a, kum li dang hman leh kan duh a, kum li hnuah ka hmu leh ang che u,” tiin a sawi a. Hei hi kum 74-a upa Trump-a’n thla khat chuan inthlan result thlak danglam a nih theih nana hma a lak hnua chak lo zawk nih a inpawmna tawngkam teuh ber nia ngaih a ni a.

State pawimawh paruk te chuan an vote chhiar te tichiang tawhin chungah chuan Biden-a’n chakna a chang vek a. Trump aiin Biden chuan vote maktaduai sarih chuang a hmu tam zawk a ni.

Thawhlehni khan Attorney General Bill Barr pawhin Justice Department chuan inthlanah inbumna emaw tihchingpen finfiahna engmah an hmuh loh thu a sawi bawk.

Hetihlai hian Biden chuan 20 January thlaa US president dinhmun luah tumin hma a la zel a, New York Times tena an interview-naah economy siamthat a tum thu sawiin, “America a investment ti hmasa ber turin theihpalingkawh kan chhuah ang,” tiin a sawi.

Trump chuan 3 November inthlanah chak lo zawk a nihna a la pawm duh lo zel a, mipui hmaa a inlan thin titlemin official meeting pawimawh tlemteah chauh a tel a, inthlanah thil dik lo a awm chungchang a ngaihdan a tweet deuh reng thung.

Trump chuan Democrats te chuan Covid-19 crisis chu remchangah hmangin mailed ballots nasa taka hman a nih theih nan hma an la a, chung te chu tihchingpen tiin a sawi a. “He inthlan hi tihchingpen a ni a, tute pawhin an hre vek,” tia sawiin, “Statistics anga chhut chuan chak lo thei ka ni lo, finfiahna tam tak kan nei a ni,” tiin Trump chuan a sawi.

Trump thlawptute chuan hma an la la zui zel bawk a. Michigan State legislature hmaah Trump lawyer Giuliani chu inlanin vote tihchingpen chung chang a sawi a.

Georgia-ah pawh lawyer dang Trump campaign nena inzawmna nei Sidney Powell pawhin rally neihpuiin an vote te chu chhiar a ni ve lo tiin an tang bawk.

Mahse, US Attorney General Bill Barr chuan ‘Tun thlengin inthlanah inbumna emaw thil fel lo a awm kan la hre lo’ tiin a sawi thung.

Inthlan result tihkhawtlai leh khin chuan thil duhawm lo lam a hawi tana ngaih a ni thung a. January thla tira US Senate seat hnih inthlan hmachhawn tur Georgia ah chuan Trump a thusawi thin te chu a hlauhawmin election officials te tan tharumthawhna thlen thei a nih thu an sawi thung a.

“Tu emaw chuan a tuar dawn, tu emaw chu kah a ni dawn, tu emaw chu thah a ni ang. A =dik lo a ni,” tiin voting system manager Gabriel Sterling chuan a sawi.

Three-star general lar tak pahnih te chuan Trump chu martial law puanga sipai kaihhruaina hnuaia inthlan that huaihawt turin an ti a. An zingah hian Trump a national security adviser hlui Michael Flynn pawh a tel.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy