Asian Games atana Indian judoka-te an inbuat-saih mek laiin damdawi hman phal loh test-na an paltlang zo lo phawk phawk a, a hnuhnungber leh doping test paltlang zo lo pangana chu thla hmasa maia Taipei Asia Open Judo men’s 66kg category gold awrhtu Jasleen Singh Saini a ni.
Jasleen-a damdawi hman an manchhuahna hi Taipei Open khelh laia an test atangin a ni a; India team coach chuan kum 25 mi dinhmun hi PTI hrilhin, Taipei Asia Open khelh laia dope test result chhuakah a fihlim lo a, Asian Games team-ah pawh a tel dawn lo tih a nemnghet.
International Judo Federation tana test leh result buaipuitute hi Interna-tional Testing Agency (ITA) niin, September ni 23 atanga October ni 8 chhunga Hangzhou Asian Games khel tura thlanchhuah hmasak zinga tel Jasleen chuan ram tan Asia inelna lian a khel thei dawn lo.
Tunhnai thlahnih chhunga dope test paltlang zo lo Indian judoka dang palite chu – Harshdeep Brar (81kg), Gulab Ali Mohsin (60kg), Rahul Sevta (81kg) leh Akshay (66kg)-te niin, tournament khelh loh lai, Bhopal-a national camp leh Delhi-a selection trial laiin National Anti Doping Agency (NADA) chuan endikna hi a kalpui a, mi palite hi an fihlim lo tih manchhuah niin, an pali hian hremna pangngai tarchhuah hma atan an ‘suspend’ phawt.
Judo Federation of India chuan kumin April thla daih tawh khan Delhi khawpuiah Asian Games khel tur ‘selection trial’ a buatsaih a, probable tichhuak tawh mah se final team erawh tarchhuah a la ni lo.
Doping test paltlang zo lo judoka Jasleen
