By Er. Chhungpuia Renthlei
Tun thla 10th February 2023 a Health & Family Welfare hnuaia LDC post 2(pahnih) hna ruak advertisement ( Advertisement No. 1 of 2023) ah khan Computer thiamna neih turah “Diploma in Computer Application/ Certificate in Computer Application from institutions recognised by Mizoram State Council of Technical Education (MSCTE)” tih a ni a. Hemi awmzia ber chu LDC post atan hian University MCA, BCA, AICTE ( ME,BE), MSCTE (Computer Sc.& Engineer) hnawlin MSCTE in certifcate a pekchhuah Private computer zirna atanga zir te chauh Mizoram sorkarin a pawm tihna a ni.
India ram chhungah University/Computer accredited course a hniam ber atanga Master degree thleng computer zirna tam tak a awm. Mizoramah pawh Mizoram University hnuaiah BCA leh MCA zirna a awm a. National Institute of Electronics & Information Technology (NIELIT) hnuaiah pawh CCC, O Level, A-Level .e.tc a awm bawk. Heng te hi University / Board mumal tak ten recognition an pek vek a ni. Tin, MSCTE hian Indian Council for Technical Education (AICTE) recognized in Computer Science & Engineering a awm bawk.
Heng zawng zawng hnawla Certificate pakhat chauh sorkarin a pawm thil mak tak leh serious tak a ni. A bikin Computer lama Graduate leh Master degree nei tan phei chuan a lungawithlak loh hle. Private computer zirna tam takah an thawk a, an zirlai ten LDC hna an dil theih laiin anni chuan an dil thei ve lo thung. Thil mak chhiar sen loh zinga chhiar mek tak a tling awm e!
Tunah hian Computer zirlai tam tak ten harsatna an tawk a.Mi rin tlaka tak hnen atanga thu dawn danin Health & Family Welfare hotu te an zawh chiang a, anni chuan Recruitment rules an zawm mai a ni tih an sawi.LDC post an dil duh chuan Private Computer hnuaia CCA/DCA Certficate nei mai turin an hrilh a ni awm e. LDC hna hi BCA, MCA, BE, etc te pawn MSCTE a CCA or DCA certificate nei turinturin an in exam leh zel anih chu! BA/MA pass tawh ten a hranpa a class I/II certificate an neih thar leh kher a ngai tihna a ni ber mai! He rules siamtu te hian hleihluak taka duhsak bik an nei ani thei em tih pawh hriatthiam a har ta.
Tunge mawhphurtu ber le?
A mawhphurtu ber chu Service Rules siamtu DP&AR hi a ni. He thil rawn intanna ber chu kum 2021-a Mizoram Ministerial Service Rules, 2021, DP&AR in Notification a tih chhuah No. A-12018/31/2020-P&AR (GSW), SCHEDULE-III [Educational and other qualifications including age limit for direct recruitment] the 30th November, 2021 ah LDC hna dil thei tur hetiang hian an tarlang a
1. Higher Secondary School Leaving Certificate from recognized institution.
2. Diploma in Computer Application/ Certificate in Computer Application from institutions recognised by Mizoram State Council of Technical Education (MSCTE).
3. Typing speed of 30 words per minute.
4. Working knowledge of Mizo language at least Middle School standard.
He rules sub no 2 hi hi siam that vat a nih loh chuan Health & Family Welfare bakah LDC post ruak hrang hrangah he rules tlawhchhan hian advertisement an la tichhuak zel dawn a nih hmel.
Engvangin nge Certificate pakhat chauh sorkarin a pawm tih hi zawhna a tam hle mai. Thu dawn danin 6th Feb ah khan RTI hial pawh submit a ni tawh. DP&AR chhan tur ngei chi niin a lang a, he thu ziah lai thleng hian chhanna a la awm lo. Zawhna langsar zual te chu :
1. LDC atan hian Computer Course MSCTE hnuaia DCA/CCA tlukpui leh a aia sang thiamna nei (Entirnan MCA, BCA, BE/BTech Computer Science/IT, BVoc (IT), Diploma in Computer Science and Engineering, NIELIT O/A/B/C level, NIELIT CCC bakah NSQF course dang) te hi engvangin nge hnawl an nih?
2. Overqualification dan nan he rules hi siam a ni em? Lo ni ta se, MCA/BCA /Computer Science & Engineer te pawh DCA/CCA nei tura hrilh an ni tho si a, engtin nge DCA/CCA certificate nei te hi an overqualify lo tih hi Department ten an zawn chhuah ang?
3. DCA/CCA te zir ang hi LDC atan a that bik vang a ni em? A nih chuan enge a thatna bik? An zir ang chiah zirna course leh a aia sang zirna course, India rama certifying body UGC, AICTE, NCVET course dang te hi engvangin nge pawm a nih loh?
Thil mak deuh chu he rules hi ICT Deptt leh MSCTE ten an hriatpui ve lo tlat. ICT deptt phei chuann an enghelh hle a, IT Minister hnuaiah meeting kovin engvanga hetianga ti nge an nih tih leh ICT Deptt hi engvanga rawn lo nge an nih tih pawh an zawt hial. Hei bakah Computer thiam ten Sorkar hna hmuh ve na tur ber Data Entry Operator leh Computer Operator post an paih daih bawk. Thudawn danin tunah hian Computer zirlaite harsatna ching fel tur hian NGO thenkhat leh zirlai pawl thenkhat ten hma an la mek a, a tul phawt chuan Court hial pawh thlen an huam bawk.
Aw le, duhsak zawng hna pek hi thil dik lo tak a ni a, a dil theitu tur thlenga thil awm-ang lo lutuka kan Sorkarin a block hi chu a pawi tak zet. Private computer zir MSCTE hnuaia DCA/CCA Certificate hi LDC hna atan a tlak loh te tih lam ni lovin, DP&AR hian LDC recruitment rules hi siam tha se, Certificate pakhat chauh pawm lovin, Mizoram chhung mai bakah India ram chhunga University/ Ministry/ polytechnic hnuai Certificate hi pawm ngei se a duhawm hle. A tawp berah chuan Computer leh internet hmangin sorkar leh mipui ten hna kan thawk tam tial tial a, electric, Water supply, Gas distribution Cable TV, Sumdawnna e.tc ah pawh a tel lovin kan awm thei lo a. Hetih lai a, kan sorkarin computer ICT leh computer zirna a hlamchhiah lutuk leh zirlai te tan a hnazawnna kawnga harsatna a siam hial mai hi a pawi tak zet a. Kan sorkar hian IT lama hma kan sawn zel theih nan ICT Deptt. hi Man power, Infrastructure, Financial lamah district level thlengin tihmasawn zel se, computer zirlai ten hna an hmuh ve theih nan post mumal tak siam belh zel se a duhawm hle mai.