Drake-a’n record siamin RIAA-certified 350M nei tling
Inrinni kalta, October ni 24 khan kum 40 a tling ta chiah a, a pianchampha lawmna pawh a nei ropui viau a, a lawmna belhchhah turin Recroding Industry Association of America (RIAA) hla leh album US-a maktaduai 350 hralh tling anga an chhih chhin chhiah hmasak ber a ni ta a, hei baka hian RIAA diamond (US-a hla emaw album emaw maktaduai 10 chin hralh tlin theih) certified hla ngah ber niin, hla 18 a nei bawk.
A pianchampha lawm tura a inbuatsaih laiin Drake hian RIAA certification 30 a dawng thar a, chung zingah chuan diamond certification kai thar ‘VIEWS’, ‘In My Feelings,’ leh “Marvin’s Room” te an tel bakah “God’s Plan” chu double-diamond a kai ta bawk. RIAA diamond certification hi US-ah album leh hla maktaduai 10 hralh tlin theih chhinchhiahna a ni.
Project leh albums lamah pawh Drae certification tharah hian More Life (6x platinum), Certified Lover Boy (5x platinum), Scorpion (9x platinum), Care Package (platinum), So Far Gone (3x platinum) leh ICEMAN (platinum) te an kai thar ta bawk. RIAA platinum certification hi US-a album leh hla maktaduai hralh tlin theih chhinchhiahna a ni. ICEMAN hi kumin May thlaa tlangzarh kha niin, thla nga chhung lekin platinum hi a kai thei a ni.
Drake hi zaithiam zingah RIAA-certified maktaduai 350 pel thei hmasa ber niin, zaithiam awm tawh zinga RIAA certified ngah ber a ni bawk. Hei bakah hian diamond certification kai thei 18 neiin, diamond certified ngah ber a ni bawk.
Drake hian a pianchampha lawmna pawh kar kalta kartir atang khan a nei tan tawh a, October ni 23 zanah New York-a Casa Cipriani-ah a lawmna pui tham tak neiin, mi 400 chuang a sawm kawm a, a mi sawm te hian thilpek tha tak tak an dawng vek a, chung zingah chuan Chanel leh Hermes handbag te pawh a tel niin TMZ chuan an tarlang a, a birthday lawmnan hian game show buatsaihin, lawman dollar maktaduai thlenga hlawh theihna te a siam tel bawk a ni.
Heng zawng zawng bakah boruak siamtu lian ber chu a pianchampha lawmna party-ah hian Backstreet Boys an zai a, 1999-a an hla it “I Want It That Way” an perform a, Drake hian stage-ah an performance hi a zawm ve nghe nghe a ni.
Drake-a’n record siamin RIAA-certified 350M nei tling
