Drama chawi nun nan

Tun hma deuh te kha chuan drama hi ‘entertainment’ pawimawh a tling a, khaw tin veng tinah drama chang thiam an awm thin tiin a sawi theih ang. Kohhran thalaite leh tlawmngai pawlte’n drama an chang a, khawtlang tinuamtu a tling thin. Drama club te pawh hmung hrang hrangah a awm thin. Tunah erawh chutiang a ni ta lo a, drama chawi san tuma beih a ngai ta niin a lang.
Mizoram Hindi Training College, Govt Mizoram LawMizo Drama Society an awm a, 2020 November thlaa din a ni. Mizo drama chawi san an tum a, a chuai mai loh nan kawng hrang hrangin tha an thawh thin. An thiltih langsar hnuhnung chu Mizo Drama Award kha a ni awm e. He award hi H Rotluanga, Mapuia tia hriat lar an hlan a, college zirlaite tan drama inchansiak an buatsaih bawk.
“Drama lama kan thawh ve te tlawm mah se hetia an lo hre ve hi ka lawm a, drama chawi san kawnga tha thawh veah min lo ngai hi ka lawm a, Mizo Drama Award min hlan hi ka lawm khawp mai,” H Rotluanga chuan a ti.
“Ka phu lo ka ti a. Phu lo inti chungin ka dawng a ni. Min duhsak hlein ka hria,” a ti a, “Drama hi chuai lo se ka duh a, lo vul deuh deuh se ka ti a, chumi atan chuan theihtawp chhuah zel a ngai a ni,” a ti bawk.
Mizo Drama Society hian drama a bua chhuah hmasa ber Lalthangfala Sailo leh Mizo drama hmasawn dan lo zir tawhtu Prof Laltluangliana Khiangte hnenah Mizo Drama Award hi an lo hlan tawh a, a tum thumnaah H Rotluanga an hlan a ni.
“A hma khan a ziaktu lam kan hlan a, chumi hnuah stage-a changtu, a ziah bakah a changtu kan hlan leh a,” an pawl secretary Laltlanmawia Vuite chuan a ti a, chawimawi tur an lo chhuah zel an beisei thu a sawi.
College zirlaite puala drama chan inelna an buatsaihah tel an tlem thu a sawi a, Mizorama college 30 chuang zingah 10 an tel a, chu chuan drama dinhmun a tarlanga an ngaih thu a sawi.
“Drama hi kan ngaihlu lo telh telh ang tih kan hlau a. Chawi nun a ngai a. Kan tunlai khawvelah Pu Mapuia’n stage drama a la buaipui tlat hi a lawmawm kan ti a, screen a hmang thiam bawk a, hetiang taka a tuipui hi Mizo drama chawi nun kawngah a tangkai em em a ni,” a ti.
“Drama hi ka ngaisang a, mipuiin an ngaihlu lo telh telh ang tih ka hlau a. Drama ropuina hi kan ngaihthah ang tih a hlauhawm a, tih theih nei teh chiam lo mah ila phak ang tawka buaipui zel hi chu ka tum,” Rotluanga chuan a ti.
Mizo Drama Society hian drama inziahsiak an buatsaih tawh a, inchansiak leh seminar te an buatsaih thin bakah World Theatre Day (March ni 27) an hmang thin bawk. Theihtawp an chhuah na a, thil han tih a harsa tih an sawi a, an pawl a la naupan bakah an pachhiat avangin thiltih a harsa tih an sawi. Mahse drama chawi nun nan hian theihtawp chhuah zel an tum a, chumi atan chuan mipui pawh an sawm a ni.