Daily Newspaper

Dream final – PSG vs Bayern

28

Europe khawmuala football club te inelna ngaihsan hlawh ber UEFA Champions League 2019-20 final chu naktuk zan khian Lisbon khawpuiah khelh a ni dawn a. German champion Bayern Munich leh Ligue 1 champion Paris St Germain te chu zanlai dar 12:30-ah an inkhel tan ang.

An hnuhma
Champion tura rinkai Bayern Munich hian a vawi 11 nan European final an khel dawn. Champions League-ah hian vawinga an champion tawh a, a vawiruk nan champion turin rin an hlawh hle. UCL final khel hnem ber dawttu an ni a, final vawi 16 khel tawh Real Madrid an tluk lova, AC Milan nen final vawi 11 ve ve an lut tawh.

Hetihlai hian final-a an khingpui tur PSG erawh final an vawikhat khelhna tur a ni ve thung. Champions League final khel tura ngak rei ber an ni. UCL-ah hian vawi 110 an khel tling tawh a, heti zat khel tawh chung hian a vawikhat nan final an khel ve dawn chauh. Premier League club lian Arsenal hi Champions League-a chetthat harsat ve bawk an ni a, 1991-2006 khan vawi 90 an khelh atangin final vawi khat chauh an khel a, final khel tura nghak rei ber an ni thin a, PSG hian an lehpel ta chiah a ni.

Final kalkawng
Bayern Munich hi an khel tha tluang hle a, final luh an phu hle. Group match-ah an chak vek a, point hmuh theih zawng zawng an hmu kim vek. Tottenham Hotspur, Olympiacos leh Red Star Belgrade te nen group khatah an awm a, group match-ah hian goal 24 zet an thun.

Knockout stages-ah pawh an chetha zui zel. Last 16-ah Chelsea chu 7-1 ngawtin an sawp. Quarter final-ah khingpui hautak zawka ngaih Barcelona an hmachhawn a, champion tura rinkai Barca hi Bayern thatzia tilang chiangtu mai an ni a, Bayern hian 8-2 ngawtin an sawp. Semi final-ah Lyon chu 3-0 in an sawp leh a, PSG hmachhawn turin final an inhlangkai ta a ni. Group match atanga semi final thlengin an hma dingte an paltlang miah miah a, saipui kal lai Uitang rualin an bauh ding zo lo chai chai hle.

A vawikhat nana final lut PSG pawh hi an khel tha tluang viau bawk. Real Madrid, Club Brugge leh Galatasaray ten nen group khatah an awm a, tlawm an nei lova, point 16 an hlawhchhuak. Last 16-ah Borussia Dortmund an hneh a, quarter final-ah an tla teuh hle thung, Atalanta hmachhawn in, minute 90 thlengin si phur zawkah an tang a, minute thum chhunga goal hnih thunin mak takin Serie A team hi an lehthal a, semi final an lut. Semi final-ah team naupang, team hmasawn chak em em mai RB Leipzig an hmachhawn a, phu taka hnehna changin final an lut.

Bayern Munich hian season kal mekah goal an thun thei hle. UCL-ah hian semi final an khelh zawh thlengin goal 42 zet an thun a, goal 8 chauh an chhuah. Shot on target vawi 99 an nei a, corner vawi 86 hlawhchhuak tawhin, semi final an khel zawh thlenga ball an chan zawng zawng hi 61% a chhut a ni a, a khingpuite an thunun hneh thei viau tih hei hian a tilang.

PSG hian semi final an khel thlengin goal 25 a thun a, goal 5 an chhuah ve thung. Goal thun tumin shot on target vawi 57 an nei a, corner vawi 43 hmuin, an ball chan belhkhawm hi 54% a tling. Semi final thlenga an hnuhma enin Bayern Munich hian an khingpuite na takin an nawr thin a, ball an chang hnem a, goal thun theihna hun tha pawh an siamchhuak mawlhmawlh thin. Khingpuite nawr leh thunun kawngah PSG hian an thlau hle tih a hriat a, chutihlai chuan PSG hian goal an chhuah tlem hret thung a, tlemin an tlarhnung a phui zawk niin a ngaih theih ve thung.

Head to head
Europe-a team lian pahnihte hi inelnaah an la intawng hnem lo hle. An intum hnuhnung pathumah Bayern Munich hi chungnung zawkah an tang a, vawihnih an chak. Kum 2018 khan International Champions Cup-ah Bayern hian 3-1 in an hneh a. 2017 khan Champions League-ah 3-1 bawkin an hneh a. 2017 vek khan champions-ah PSG hian Bayern hi 3-0 in an sawp ve thung.

Player hmuhnawm tur
Season kal mekah Bayern Munich forward Robert Lewandoski a chetha hle a, inelna hrang hrangah goal 55 zet a thun tling tawh. Champions League-ah pawh goal 15 a thun tling tawh a, topscorer a ni chiang tawh. Poland forward hian PSG lakah goal hnih a thun a nih chuan UCL-ah season khata goal thun hnem ber Cristiano Ronaldo record a nih rual thei dawn. Lewandoski hi Bayern tan player pawimawh leh hmuhnawm a ni leh ngei dawn. Tlarhmaa a kawppui, goal thun thei tak Serge Gnabry pawh player hmuhnawm ni leh ngei tura ngaih a ni.

PSG hmatawng pahnih Neymar leh Kylian Mbappe te chu player thawm nei lian, player hmuhnawm an ni leh ngei dawn. Anni pahnih bakah hian semi final-ah goal thuma inrawlh vek Angel di Maria pawh player hmuhnawm a nih ngei a rinawm bawk. Quarter final-ah PSG chhandamtu ni a, semi final-ah pawh goal thun zui leh Marguinhos player hmuhnawm a nih leh ngei a rinawm bawk.

Treble champion
Final-a intum tur Bayern Munich leh PSG te hi inelna pahniha champion tawh an ni a, champion zawk zawk hi treble champion an ni dawn.

Bayern Munich hi Bundesliga leh DFB-Pokal-ah an champion tawh a, final-ah PSG an hneh a nih chuan a vawihnih nan treble champion an ni dawn.

PSG pawh hi Ligue leh Coupe de la Ligue-ah an champion tawh bawk a, Bayern Munich an hneh a nih chuan a vawikhat nan treble champion an ni dawn.

Tualchhung leh Europe-a chetha, treble champion ni thei ve ve Bayern Munich leh Paris St-Germain te intumna tur a nih miau vangin nakzaka UCL final khelh tur hi ‘final duhthusam’ tiin a sawi loh theih loh a, football ngainatute tan en hmaih thiang lo tluk a ni ngei ang.

(THE AIZAWL POST – Infiamna)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy