Ukraine-a Chernobyl nuclear reactor khuhna, protective shield chu kumin kum tira drone-in a fuh atangin mihring tana him khawpin a tuam zo tawh lo tih UN hnuaia viltuten an sawi.
International Atomic Energy Agency (IAEA) inspector-te chuan kum 1986-a nuclear chhiatna thlenna hmun khuhna hi an endik a, ‘a tuam himna ber hi a nih tur angin a thawk tawh lo’ tih an sawi.
February khan Ukraine chuan Russia-in power plant hi an kap fuh tih an sawi a, Kremlin-in a pha thung.
IAEA chuan ‘a chhiat belh zel loh nan siam that tul hle’ tih an sawi.
Chernobyl chhiatna thleng zirtu, UK-a University of Portsmouth Prof Jim Smith-a chuan hlauhawm ber chu radioactive dust leng vel a ni tih a sawi a; mahse, a hmun ber hi concrete chhah tak, ‘sarcophagus’ hmanga khuh a nih avangin a darh a hlauhawm lutuk loh niin a sawi.
Kum 1986-a Chernobyl puak khan radioactive zungzam tam tak boruakah chhuahin Europe hmun hrang hrangah vantlang hriselna him nan emergency puan a ni a. Soviet Union sorkar khan nuclear reactor khuh nan sarcophagus hi a siam ta a ni.
Sarcophagus hi kum 30 daih a ni a, hei vang hian kum 100 chuang lo awm leh tur daih thei tura tuamna hran siam leh ngai a ni.
IAEA chuan kar hmasa khan team-in a drone-in a fuh avanga thil chhiate an zir chiang zo tih an sawi a. Steel structure pawn lam a kang chhia tih an sawi.
Inspector-te chuan a pawimawh zual lai tak tihchhiat a awm lo va, a chung vel chu siam that nghal a ni tih an sawi bawk.
Hetih rual hian IAEA Director General Rafael Grossi-a chuan, “A hun taka thil tha lo awm palh zel thei veng tur leh nakin zela nuclear himna atan siam that thuai chu a ngai hle,” a ti.
December thla tir atang khan UN hnuaia nuclear thlithlaitute hian Ukraine-a energy hmunte chu endik hna an thawk tan a. Chernobyl bakah hian IAEA hian nuclear himna tiderthawng thei a awm palh theih avangin electrical substation-te pawh an endik nghal a ni.
Drone-in a fuh vangin Chernobyl nuclear reactor him tawh lo
