Drone-in loneitute hmunhma en dawn
Digital Agricultural Mission-Aerial Survey of Agricultural Land chungchang ngaihtuahin district bawrhsap Paul L Khuma kaihhruaiin Thawhlehni khan Serchhipah thutkhawm a ni.
Agriculture & Farmers’ Welfare department atanga thu an hmuh anga thutkhawm koh a ni tih bawrhsap hian a sawi a. Serchhip district-a loneitute hmasawnna atan pawimawh tak, arial survey neih a, an hmuhhma eng ang nge a nih a, eng thlai nge chin theih tih ngun taka zirna tur ngaihtuah a tul tih a sawi a ni.
He hna thawktu tur M/s Theta Enerlytics Pvt. Ltd. New Delhi chairman Colonel Anil Kumar Mehta (Rtd) chuan Digital Agricultural Mission kaltlang hian Mizorama loneitute nasa zawka hma an sawn theih a beiseiawm tih a sawi a. Hmalakna hmasa ber atan Serchhip district thlan a ni, tiin, he hmalakna hnuaiah hian loneitute dinhmun chiang taka zirin, an ram awm dan azira hma an lak dan tur enpui an ni dawn tih a sawi a ni.
Department hrang hrang – Sericulture, Horticulture, AH & Vety leh Soil & Water Conservation hnuaia loneitute hmunhma chu drone hmanga en a ni anga, survey atana inbuatsaihna atan vawiin – January 8 hian heng department-a thawktute tan training buatsaih nghal a ni ang.
Drone-in loneitute hmunhma en dawn
