Covid inkhuahkhirh nasat lai khan ruihhlo supply a tlem a, a ngawl vei nia hriat ten harsatna an tawk viau tura ngaih a nih laiin, an nghei thei tih chu an zirchhuah a ni tih chief minister Lalduhoma chuan a sawi.
Mizoram Police huaihawtin Inrinni zing khan Aizawlah ruihhlo dona kawnga hmalakna pakhat – ‘Drugs Free Mizoram Walk 2024’ neih a ni a. Zingah Chanmari kawn atangin chief minister Lalduhoma’n vailiamin, Aizawl Sipai Lammual panin ruihhlo thatlohna inzirtirna leh ruihhlo duh lohna thuziak kengin an kal a, Lammualah a kharna inkhawm neih a ni. Assembly speaker Lalbiakzama, Home minister K Sapdanga, minister ho – C Lalsawivunga, Lalrinpuii leh Lalnghinglova Hmar; adviser to chief minister te, MLA, chief secretary leh sawrkar mi pawimawh dangte an tel.
Ruihhlo in kan thalaite nunna a suat nasa a, a bikin mipaten he ruihhlo avang hian nunna kan chan nasa hle tih chief minister hian a sawi a. Hei vang hian hmeithai leh fahrah kan pung zel a, Mizote chu hnam dam rei lo pawl tak min nih tir a, thlanmualah thalai thlan a tam em em tih a sawi. “Hetiang zela kan kal chuan kan hnam hian a la tuar hle dawn,” a ti.
Covid len lai, inkhuahkhirhna a nasat lai khan ruihhlo tih tur a tlem viau a, ruihhlo ti ten harsatna an tawk viau tura kan ngaih laiin, a nghei theih a ni tih an hre ta zawk tih a sawi. “Chuvang chuan ruihhlo hi kan ramah tlem se, kan hnam timualphotu, kan ram tihmingchhetu hi kan za in pheikhai rualin do ang u,” tiin mipui a sawm.
Chak zawka a dona lam kalpui a nih theih nan, hun engemaw chen lo thukhawm tawh lo Ruihhlo Do Core Committee an tuaithar a, supply lam tihtlem hna Excise & Narcotics department mawhphurhnaah dahin, demand tihtlem lam Social Welfare kutah an dah a, fel takin hmalak dan tur an thliar a. Central YMA kutah an innghat thuk hle tih chief miister hian a sawi a ni.
Home minister K Sapdanga chuan kan rama ruihhlo hluar chu tun hnai maia hluar a ni loa, sawrkar thar a pian veleh khan Excise & Narcotics minister nen ruihhlo lo luhna hmun nia rin, khawchhak lam ramriah hna bul tan nghalin, sawt zawka a do dan tur nasa takin an ngaihtuah tih a sawi. “Drugs zuartute leh a buaipuitute hi mi tam an ni loa, a nghawng erawh mi tam tak kan ni thung. Chuvangin tangrual ila, a vaia a rem thei lo a nih pawin a ziaawm thei. Sawrkar atangin theihtawp chhuahin kan do anga, hemi kawngah hian khawtlang, kohhran, chhungkua, sikul leh tlawmngai pawlte kan zavaia inlungrual taka tang ho zel turin kan insawm a ni,” a ti.
Excise & Narcotics minister Lalnghinglova Hmar chuan, ruihhlo chu a zavaia tih rem a har deuh a nih pawhin, tun aia ruihhlo zalen lohna zawk ni turin theihtawp an chhuah dawn tih a sawi a ni.
Drugs ngawl veite hian an hun tawn azirin an lo nghei thei viau – Chief minister
