Daily Newspaper

Duhoma’n an puhna te la chhang lo ‘Min sawm se chu MNF-ah pawh ka lawmlut duh’

25

Aizawl, October 6 : Dan bawhchhiaa puh, Serchhip bialtu MLA Lalduhoma chuan amah an puhna te a la sawifiah lo a, insawifiah tura tihnate a la chhang lo.

MNF MLA 12 te’n bantir tura an puh Lalduhoma hi October ni 8 thleng hun pek a ni a, ziakin a thiamthu sawi tur leh speaker hnena thehlut tura tih a ni.

Duhoma chuan insawifiah tura tihna hi a la chhan loh thu leh hun a la awm thu te The Aizawl Post a hrilh a, “Hun a la awm alawm, hun tiam chhungin kan chhang ang,” a ti. “Thiamthu sawi tura tih ka ni a, kan thiamthu te kan sawi ve ang chu,” a ti bawk.

Independent ticket-a thlantlin ni chunga ZPM-a tela puh Duhoma hian kar liam ta Inrinni khan Sumsuih-ah ZPM-ah mi a lawmluh thu ZMP chuan an puang a, mi 81 a lawmlut tih an thuchhuahah a lang.

Hemi chungchanga zawhna chhangin Duhoma chuan, mi lawmluh chu dan bawhchhiatna a ni lo tiin a sawi a, “Inlawmluh te chu thil tha a ni a, a lawmawm alawm. MNF pawhin min sawm se, an party-a mi lawmlut turin min sawm se ka lawmlut duh ang,” tiin nui chungin a sawi.

“Zinnaah te pawh party mi ni miah lote nen a zinho theih a, party dang mite nen pawh kan zinho thei,” a ti bawk.

“Mi kan lawmluh thu ni lovin party-ah enrollment kan ti em tih zawk kha a pawimawh,” a ti a, Nilaini-ah pawh ZPM-ah mi a lawmlut leh dawn tih a sawi.

ZPM hruaitu thar atana ruat a ni lo chu mak a tih loh thu a sawi a, “Party-a nihna neih hi thil tul ber a ni lo… Mahatma Gandhi pawh party-ah nihna a neih leh neih lohvah teh a ni lo a, party-a nihna a neih loh pawhin a tangkai em em a, an hotupa ber a ni tho,” a ti.

ZPM an lungrual niin a sawi a, “Thil hi a tha ber tur kan ngaihtuah a, kan lungrual a, hma pawh kan sawn,” a ti.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy