Durtlang kawng, Bawngkawn ramchhung ‘Haflong’ hmuna in hmun neitu in lei a laih vanga tunhnaia leiminin nunphung a tihbuai phah chungchangah social activist Vanramchhuangi chuan a tul anga hma laksak turin Bawngkawn Police Station-ah FIR a thehlut a, Aizawl bawrhsap chu a FIR ah hian a ‘address’ a ni.
Kawng pawimawh, ei leh bar lakluhna ni tel bawk, damdawi in leh hmun pawimawh dang bakah nitin eizawnna kawnga mipui tana inkalpawhna hmun pawimawh, lei laih avanga min a, kawng a hnawh leh nunphung a tih buai dan chu pawmzam chi a ni lo tih Vanramchhuangi hian sawiin, ‘Kham pang ko sang lutuka in hmun atana lei laih khi, furah a min ngei ngei ang tih hre turin geologist nih a ngai lo a. Mi pangngai chuan mihring chhia leh tha hriatna thiang tak hmangin, kan ram leilung dawrawm leh derdep, keh leh sawm sa ang maia nghet lo, kham ko sang lutuk laih hi ram leilung leh mihring tuarna nasa tak thlen thei a nih avangin thil thiang lo a ni. Chu chu ngaihthahin an haider lui a, mipui pawisakna an neih loh vangin an lai lui a tih loh theih loh. Mipui singtelin kan tuar ta ngei a ni,’ a ti.
Heng avang hian he lei laiha mawhphurtu – in hmun petu/ hming sign-tu, lei laih phalna petu, no objection certificate petu, leilung a him tih certify-tu, lei laitu leh lei laia awihpang dawlnghehna lungbang (retaining wall) sa nghal lotu, helai hmun viltu – technical license holder hrang hrang leh mawhphurtu dang awm apiang chu chhui chhuak a, an thiltih sual phu tawka hrem an nih ngei theih nan dan anga hmanla turin a ngen tih a thlen a ni.
Durtlang kawng ‘Haflong’ rama lei laitu lakah hma la turin FIR thehlut
