Durtlang North chak loh Hlimen tan damna

Durtlang North chak loh Hlimen tan damna
Thawhlehni zanah league-a pakhatna ni chiang sa tawh Hunthar an hneh chuan Durtlang North-in semi-final luh theihna chance an nei a, mahse, Hunthar lakah an chak zo lo a, Thawhtanni zana Hlimen hnehtu Chhinga Veng Spikers-in table-a palina luah chungin last four an lut ta zawk a, Durtlang North-in semi-final an thleng pha lo chiah chiah.
LPS Arena, Falkland-ah point khat hmuh belha knockout round lut thei dinhmunah vawi thum Durtlang North awm mah se an puitlin lo a, Huntharin 25-21, 25-22, 24-26, 26-24-a an hneh rualin an elpui Chhinga Veng Spikers an tlang.
League pum pui kharna inkhelah hian 2022 champion Durtlang North-in semifinal lut turin point khat neih belh an mamawh a, set hnih tal an lak a tul.
Pakhatna ni chiang sa tawh Huntharin set hmasa pahnih an la zawn nghal a, a kaw tawp atangin Durtlang North-in player tawn hriat nei tlem zawk luhtirin an bei let. Alex Remruatkima leh Vanlalthuama’n team fuih phurin vawi khat an deuce hnuah set thumna an la.
Set linaah Thuama’n hui tlain 24-21-in an sang a, point khat hmuh belha semifinal lut turin hun tha vawi thum an nei zawn. An dinhmun nghaktu Chhinga Veng tan beisei a bo hman a, mahse, Huntharin dang betin point nga an hmu zawn a, uiawm takin Durtlang North an tla.
Vawi nga an khelhah Hunthar chak vekin a tum khat nan set an hloh ve thung a, semifinal-ah Chhinga Veng nen an inkhel ang. Durtlang North-in point nga thawk chhuakin panganaah an awm a, set hnih la se point ruk hmuin Chhinga Veng an nih rual ang a, set an lak leh hloh dan atangin an sang zawk dawn a ni.
A vawi thum nan champion thei turin Huntharin league an thunun hneh hle a, Durtlang North hmaah Fabian Lallunghnema’n vawi 23 vaw tlain point kua a hloh a, a vawi khat nan Kuriz Player of the Match-a thlan a ni a, a kawppui Anurag Rawat chuan point 29 hmuin 17 a hloh.
Hun pawimawhah Durtlang North player langsar an che tha lo va, Johan Vanneihsanga’n tum 11 hlap tlain point kua a hloh a, Shashank Kandpal chuan point nga hmuin tum li a tisual a, Thangminlal Guite chuan point li a hlawh aia tam point nga a paih.
Set khatnaah Huntharin Shashank-a vuak an dansak atangin 12-11-in an sang a, hawi kir tawh lovin hma an hruai tluan a, 24-21 a nih laiin Fabian-a’n a hlap tla.
Set hnihnaah 18-18 a nih laiin Johan-a’n a vuak sual avangin Hunthar an sang zui a, Alex-a nam tlak hmangin 23-22-in Durtlang North-in hnaih leh hman mah se Anurag chuan tum hnih a hlap tla zawn a, set hmasa ang thovin thil a thleng.
Set thumna tan dawnah Huntharin setter Remsangzuala hahchawlhtirin C Laldawngkima an dah lut a, Durtlang North-in setter H Lalruatsanga aiah Joseph Lalsangzela luhtirin Shashank leh Thanga an thlak bawk.
Khelmual kotlanga anmahni tantuten Durtlang North an au nasa a, H Malsawmsanga point hmuh hmangin 20-20-a an intluk hnuah 24-23-in Hunthar an sang leh a, Fabian-a’n vaw tla se set thum fai veka chak chunga league khar tur an nih laiin a ball vuak an laksak.
Johan-a’n hlap tla ve thungin 24-24-in Durtlang North-in an nih rual a, Sawmsanga’n a service hmanga point a hmuh hnuah 25-24-in an sang zui. Hunthar derthawngin Anurag chuan line pawnah a vaw chhuak a, a vawi khat nan set an hloh.
Set linaah 11-10-a sang zawk an nih laiin Huntharin an khelh hnuhnun bera Kuriz Player of the Match-a thlan Remsangzuala dah lutin chak ngei tumin an bei. Mahse, Durtlang North-in zangkhai leh hriam takin an bei zui zel a, Thuama’n a vuak tlak hnuah Fabian-a’n hlap sual ve thungin 22-18-in hma an hruai.
Set la zawn thei tura 24-21-a sang zawk an nih hnuah thil awm dan a danglam thut. Rilru lama inbeihna hautakah Durtlang North-in point khat chauh mamawh mah se harsatna an tawk a, Huntharin point hnih hmu zawnin 24-23-in an hnaih.
Hun tha an la neih tihlawhtling turin setter Joseph-a’n Alex-a tan ball vawrhsakin ani’n vuak tlak ngei a tum laiin, Anurag chuan net chung atangin chiang takin a dang tla. 24-24 a nih hnuah Sawmsanga’n a vaw sual leh a, Huntharin chak theihna remchang an neih hmasak berah C Lalhriatpuia’n a hlap tla a ni.
Lungchhe takin Durtlang North-in tawp an khar a, Alex-a’n point 11 hmuin tum hnih chiah a tisual a, Thuama’n point hloh miah lovin vawi kua a vuak tlak laiin Sawmsanga’n tum 15 hlap lain point kua a hloh a, setter Joseph-a’n point hloh nei lovin tum ruk a hlawh chhuak.
Hlimen hnehtu Spikers
Chhinga Veng Spikers-in beiseina nen league an zo a, Thawhtanni zan Ather Pro Volleyball League-ah set thum set khatin Hlimen an hneh.
LPS Arena, Falkland-ah Chhinga Vengin awlsam taka set hnih an lak zawn hnuah player tha an awltir a, Hlimenin an nawr let hnuah Yougank Baliyan leh Lalneihpuia Hrahsel chuan hruai kir lehin 25-16, 25-16, 20-25, 25-22-in an chak.
Semifinal an beiseina tinung turin Chhinga Veng tan chak a ngai a, a tha thei ang bera hnehna chan an mamawh tel bawk a, khelh ngaah point ruk thawk chhuakin palina an luah lailawk. An elpui Durtlang North-in point nga kawlin Thawhlehni zanah hmahruaitu Hunthar nen an hneh ta lo a, Spikers an lehthal zo lo.