Durtlang North to Sihphir kawng zauh hna thawh mek chu Inrinni zing khan PWD minister Vanlalhlana’n a hmunah a endik.
Durtlang ‘N’ to Sihphir inkar kawng hi km. 10.25 niin Central Roads and Infrastructure Fund (CRIF) Scheme hnuaiah a zauh hna hi thawh a ni. Sum ruahman hi cheng nuai 4657.00 niin, thla 30 chhunga thawh zawh hman tura tih a ni. 2023 July 14 -ah hna tanin, M/s SLT Infracon Private Ltd-in a thawk a ni.
He kawng laih mek avang hian kawng danpin thin a nih avang leh a thawktu contractor-ten formation cutting an zawh veleh mipui veivakten harsatna an tawh loh nan GSB (Granular Sub base) phah nghal thin turin minister hian a hrilh a. Kawng siam hi GSB chungah dry lean cement concrete (M15) leh PQC (pavement quality concrete) – M40 phah leh tur niin, a pumpuia kawng chah zawng hi metre chanve a tling dawn a ni.
Minister leh PWD hotute chuan Khelo India hnuaia cheng vaibelchhe 4.5 senga sak tur Indoor Sports Complex hmun laih zauh dan tur leh a panna kawnga lirthei lian leng thei tura laih zauh dan tur an enho bakah Leitan Zotui Veng atanga Zuangtui Selesih kawngpui pawhna kawng RCC balcony-a siam chu a hmunah an tlawh bawk.
Durtlang-Sihphir kawng zauh endik
