Site icon The Aizawl Post

e-Connectivity ngaipawimawh turin ruahmanna siam r’u – Union MoS

e-Connectivity lama Mizoramin harsatna a neihte hrereng chunga centre-a ruahmanna an thehluhten ngaihpawimawh a hlawh theihna’n uluk turin Union Minister of State for Communication Devusinh Chauhan chuan Mizoram official-te a chah.
Zan hnih riaka Mizoram tlawhtu Union MoS for Communication ho hian Inrinni khan Information & Communication Technology minister Robert Romawia Royte, chief secretary Dr Renu Sharma, ICT special secretary SM Ali leh official dangte an thukhawm a. Chief secretary hian ICT hmasawnna tura Special Assistance to States for Capital Investment hnuaiah ministry-in tanpuina a pek avangin lawmthu a sawi.
Union MoS chuan Mizoramin kawng hang hrangah chak zawka hma a sawn theihnan e-connectivity tihchangtlun a pawimawh hle dawn tih a sawi a. Inkalpawh leh inbiakpawh tawnna a thatna apiangah hmasawnna hna chak zawkin a kal thei a, Mizoram anga tlangram leh kawngpui tha siam awlsam lohna hmun angah hlei hlei e-connectivity a tangkai zual thei tih a sawi a ni.
“Central scheme tam tak kalpui mek hi e-connectivity tha neih hmasak loh chuan hna thawh that a har dawn a, thingtlang khua engmawzat e-connectivity in a la thlen phak loh avangin engemawchen chu scheme kalpui tum mah se, a thlen tur diktak, a tangkaipui tur diktak mipuiin an chhawr thei lo thin,” a ti a. Thingtlang khaw tam zawkah bank leh insurance agency lam an awm mang lo pawh e-connectivity chak loh vang a ni, Devusinh Chauhan hian tiin, Mizoram harsatna hrereng chunga hmalak dan tur ruahmanna leh hmachhawp an thehluh hunah pawh uluk lehzual turin state ICT official-te a chah a, sawrkar laipui lamah theihtawp a lo chhuahpui tur thu a hrilh.
State ICT minister chuan sawrkar laipui Communication minister zingah Mizoram tlawhtu hmasa ber leh e-connectivity lamah Mizoram hmasawnna a tak taka duhtu a nih avangin Union MoS hnenah lawmthu a hrilh a. Mizoram chu tlangram a nih vanga harsatna hrang hrang awm theite sawiin, heng harsatna karah pawh central scheme-te chu Mizoram sawrkarin theihtawp chhuahin mipuiin an chhawr phak turin a kalpui zel tih a sawi a ni. e-Connectivity tihmasawn tur chuan service provider hrang hrang – BSNL, Airtel, Jio leh a dangte inkarah thawhhona tha zawk neih a ngai a, hemi kawngah pawh theihtawp chhuah a ngai tih a hrilh. SASCI hnuaia project hrang hrangte chu hunbi nei (time bound) a nih avangin state ICT official-te pawhin a hun takah project zawhfel a nih theih nan nasa lehzuala hna thawk turin a fuih nghal bawk.
Mizoram special secretary ICT SM Ali chuan power presentation hmangin Union MoS chu ICT lama Mizoram dinhmun a hrilhfiah a ni.

Exit mobile version