Union health secretary chuan state thuneitute chu Ebola leng mekah inbuatsaihna leh a thlen palha pawha hma lak dan tur ngaihtuahin high-level meeting a neihpui.
Health Secretary Punya Salila Srivastava chuan state leh union territory zawng zawnga health secretary-te nen hmalak dan tur an sawiho.
Health ministry chuan tun thlengin India ramah Ebola vei an la awm lo tih a sawi a; mahse, World Health Organization (WHO)-in Public Health Emergency of International Concern (PHEIC)-a a puan hnuah sorkar chuan fimkhurna thilah ram pumah enfiahna leh inbuatsaihna a kalpui mek.
Nilainia thutkhawmah hian state leh UT-te chu level tinah inpeih reng tura hriattir an ni.
Standard Operating Procedures (SOP) hrang hrang, a lo thlen hma leh hnua screening, khungran, a kai buaipui dan, a kaite sawn dan leh laboratory test te chu state leh UT zawng zawng hnenah sem a ni tawh.
“Health secretary chuan thlithlai, a hun taka report pek leh enkawlna hmun bik tur hmun buatsaih a pawimawh thu a sawi a, a kaihhnawih ministry leh department zawng zawngte pawh inpeih vek a ni a, health ministry nena inrem takin a invenna leh thlithlai tul ang mumal taka kalpui mek a ni,” tiin sorkar hotu pakhat chuan a sawi.
Ministry chuan India chuan hetiang dinhmun hi tha taka a hmachhawn turin a hmain tawnhriat a neih thu a sawi nawn leh a, kum 2014-a Africa-a Ebola len lai pawh khan fimkhurna ang chi hi hlawhtling taka kalpui a ni.
Tun thlengin Democratic Republic of Congo (DRC)-ah hri kai hi mi 51 hmuhchhuah a ni tawh a, WHO chuan DRC-a hri leng darh zau zawng hi lian tak a ni theih thu a sawi.
Uganda-ah DRC atanga zin mi pahnihin hri an kai hmuh tawh niin pakhatin a thihpui tawh nia sawi a ni.
“Indian sorkar chu a fimkhur hle a, dinhmun lo thleng apiang chu rang taka chhang let turin a inpeih reng a, mipuite chu hlauhthawn chhan tur a awm lo tih hriattir an ni a, chutih rualin hriselna kaihhnawiha hotute thurawn leh thu thar tihchhuahte zawm chhunzawm zel a tul a ni,” tiin health ministry-a thuneitu sang chuan a sawi.
Ebola chungchangah health secy-in state hotute kawm
