Ebola leng mek kan umpha hnai – WHO

Ebola leng mek kan umpha hnai – WHO
World Health Organization (WHO) chuan Democratic Republic of Congo-a Ebola leng mek chu khawvelin ‘a umpha hnai’ tih a sawi a, he natna vei hi mi 344 an awm tawh a, mi 60 an thi tih finfiah a ni tawh bawk.
WHO Director-General Tedros Adhanom Ghebreyesus-a chuan Nilainia thuthar la khawmtute a kawmnaah, “Hri leng hian bul tanna lian tak a nei a, kan la hnufual deuh va; mahse, DRC sorkar kaihhruaina hnuaiah kan umpha chho zel a ni,” a ti.
He hri leng hi Bundibugyo chi a ni a, thenawma Uganda-ah pawh a darh tawh a, a kai mi 15 hmuh a ni tawh a, pakhatin a thihpui tawh niin agency chuan a sawi.
Endik theihna pawh a tha chho hle a, hei vang hian a tira Ebola kai nia rinhlelh tam tak chu tunah chuan an awm tawh lo niin WHO chuan a sawi a. Ebola kai leh kai loh finfiahna atana hman tlanglawn berte chuan a thlentu ber, Bundibugyo an hmu lo hlawm a ni.
“Field team-in endik ngaite endik vek tumin hma an la a. Tun thlengin lab-ah test 1,445 tih a ni tawh a, en hmabak an tizo hnai tawh a, ni tin uluk taka thlithlai a ni a, rinhlelh pawh an awm thar zel bawk,” tiin WHO Health Emergency Alert & Response Operations Director Abdirahman Mahamud-a chuan a sawi.
Finfiahna nghak mek mi 116 an awm tih a sawi a. Team khatin ⁠thi nia rinhlelh 220-te chu Ebola vanga thi an ni em tih hriat chian tumin hma an la mek tih a sawi bawk.
DRC-ah mi paruk leh Uganda-ah mi pahnih an dam tawh a, hei hian Ebola veite chu an taksaah natna a lan chhuah veleha enkawl chuan an dam chhuak thei tih a tilang niin agency chuan a sawi.
Hri leng dona atana endik tihpun leh hri kaite hnuhma chhui kawngah harsatna a la awm zel rih a, ram thenkhatin veivah an khap avangin mamawh lakna a buai a, hei hian chetna a tibuai niin agency chuan a sawi.
Hri kaite hnuhma 45% vel chauh chhui zui theih a ni rih a, hri leng umphak tur chuan 90% aia sang a nih a ngai niin Tedros-a chuan a sawi.
Tedros-a chuan January atang khan hri leng hi a intan tawh mai thei tih a sawi bawk a, ⁠team-ten an la chhui mek a, tunah erawh chuan hri darh zel tur venna lam ngaihtuah zawk rih a nih tur thu a sawi.
Hri leng darh tur dang tur hian thla thum chhungin WHO hian dollar maktaduai 115 vel a sen a ngai dawn a, heng zinga 35% vel chu thawhkhawm a ni tawh tih agency emergency head Chikwe Ihekweazu chuan ⁠a sawi a, sum tam zawk a ngai dawn tih a sawi bawk.
Africa Centers for Disease Control & Prevention leh Congo leh Uganda sorkar bakah thawhpui dangte nen ruahmanna zau zawk leh sum thawhkhawmna chu Zirtawpni hian kalpui a ni dawn tih a sawi.