Africa ram hmun thenkhatah Ebola leng vangin India leh African Union chuan tun thla tawp lama neih tur, India-Africa Forum Summit (IAFS) chu Ningani khan an sawn hla.
An indawr hnuah ‘nakina India-Africa Forum Summit vawi lina koh a tha dawn tihah an inrem’ tiin thuchhuah intawm an siamah an tar lang.
Indian sorkar leh African Union chuan India-Africa Forum Summit nei tur hian an inbuatsaih nasa hle a, May 28–31 chhung hian New Delhi-ah neih tura ruahman a ni tawh.
“Africa hmun thenkhata hriselna dinhmun inthlak danglam zelah ngaihdan inhrilhin khawmualpui pumah mipui hriselna atana inbuatsaihna leh chhanchhuah theihna tihchakna kawngah thawhhona chhunzawm zel a pawimawh thu an sawi nawn leh a, hei hi Africa CDC leh a kaihhnawih national institution-te puihna hmangin a tel a ni,” tiin thuchhuahah tar lan a ni.
African hruaitute leh a kaihhnawihte telna leh inrawlhna famkim neih a pawimawhzia hriain, ‘khawmualpuia mipui hriselna dinhmun ngaihtuah chungin’ Indian sorkar, African Union chairperson leh African Union Commission inkara summit neih dan tur leh a kaihhnawih hmalakna chungchangah inrawn a ni tih an sawi.
Zirtawpni thleng khan Africa Centers for Disease Control and Prevention (Africa CDC) chuan hri kai nia rinhlelh mi 246 (Ebola nena inmil, laboratory-a finfiah loh) leh thi 80 an nei tawh a, a bik takin Democratic Republic of Congo-ah an an tam zual.
India-Africa Forum Summit leh a kaihhnawih meeting neih hun tur thar chu inrawn leha tihfel a ni ang.
“India leh Africa chuan hun rei tak chhunga an thawhhona, inpumkhatna, inzah tawnna, remna, hmasawnna, hausakna leh an hnamte hamthatna tura inpekna insemna atanga din chu an nemnghet leh a ni,” tiin thuchhuahah hian tar lan a ni.
Ebola leng vangin India-Africa Forum Summit hun sawn
