Election Commission of India bultuma kumin May 20 atanga September 6 inkara electoral roll siamthat runpui, Special Intensive Revision (SIR) of Electoral Rolls kalpui mekah ECI deputy director Apurva Kumar Singh chuan Mizoram rawn tlawhin, Nilaini khan chief electoral officer Mizoram Garima Gupta nen an inkawm.
Hemi hnu hian Mizoram district hrang hranga media lama mawhphurtu, district media nodal officer (DMNO) te nen media & communication chungchanga hmalakna kal mek thlirhoin, hmalak zel dan tur an sawi.
ECI deputy director chuan, SIR chu India khua leh tui, kum 18 tling chin, electoral roll-a chuang theite kim taka an chuan theihna atan leh vote nei thei lo roll-a an chuan lohna tura hmalakna pawimawh a ni tih a sawi a. Hlawhtling taka SIR kalpui a nih theihnan media kaltlanga zau taka puanzar leh hmalakna hrang hrang tarlan a pawimawh, tiin, chumi atan chuan ruahmanna fel tak duang lawk a, chumi anga hma lak chu a pawimawh tih a sawi.
District tina DMNO leh DMANO-ten hma an lak tawhna leh hmachhawp an sawi a. ECI deputy director hian powerpoint presentation hmangin “Media & Communication SOP” zirtirin, SIR chungchang puanzar leh tih lar kawnga hmalak dan tur leh ngaihpawimawh tur a zirtir a. Zawhna awmte chhan a ni bawk.
Vawiin, Ningani hian ERO office tlawhin, BLO-ten enumeration form an sem dan a enpui anga, chawhnu lamah thuthar thehdarhtute a kawm ang.
ECI DD-in SIR kalpui dan enpui
