Daily Newspaper

ECI-in Bru-te vote thlak dan tur la ngaihtuah lo; An vote neihnaa thlak loh chuan dodal dawn

16

Aizawl, October 14: Tuirial bial by election neih turah he biala vote nei Bru-te vote thlak tur leh tur loh emaw an vote thlak dan tur emaw chu Election Commission of India-in a la ngaihtuah lo a, vote an thlak dawn a nih pawhin an vote neihna hmuna anmahni inngaihtuah chawpa vote an thlak dawn lo a nih chuan dodal an tum tih tlawmngai pawlte chuan an sawi.

Nilaini khan Mizoram chief electoral officer P Jawahar, IAS chuan NGO hrang hrang aiawhte Aizawlah kokhawmin October 30-a Tuirial Assembly bial by election atana inbuatsaihna kalpui dan leh Tripura Transit Camp-a awm Bru voter-te electoral roll atanga hming paih chungchangah Election Commission of India nen an indawr dante a sawi.

CEO Mizoram chuan Mizoram electoral roll atanga Tripura camp-a cheng mek Bru voter-te hming paihchhuah tura ngenna NGO leh political party hrang hrang atanga a dawn chu ECI hnenah thawn a nih tawh a, chhanna nghah mek a ni tih a sawi. Inthlan a puan tawh angin ECI kaihhruaina zawmin Election department chuan inthlan neih turah a inbuatsaih mek zel a, boruak muanawm hnuaiah inthlan felfai neih ngei a beisei tih a sawi a ni.

Thutkhawmah hian tlawmngai pawl aiawhin Central YMA president Vanlalruata chuan Tuirial bial by election neih turah Tripura-a awm Bru, Mizorama vote neite chu Mizoram chhungah ngei vote thlaktir turin CEO hnenah a thlen.

Central YMA president chuan Tripura-a awm Bru, Mizorama vote neite chu a hranpaa an awmna hmuna vote thlakna siamsak an duh lo tih sawiin, siamsak an nih chuan Mizorama NGO-te leh poilitical party ten an duh dan an lo thlen thin tawh angin, na takin an dodal dawn tih CEO Mizoram hnenah hian an thlen tih a sawi. Bru-te chu an vote neihna hmun khuaah vote thlak ve mai tur an ni, tiin, a hranpaa vote an thlakna tura hun leh hmun ruahman bik neih emaw postal ballot hmang emawa ECI-in a ruahman sak chuan na takin an dodal dawn tih a sawi. Mizoram CEO chu an duhdan an thlente ECI-a thlena hma la turin thutkhawmaah hian an ngen tih a sawi a ni.

Thudawn danin Mizoram CEO hian NGO-te leh political party ten Bru voter te chungchanga an duh dan hi ECI-ah hian chiang takin a thlen tawh a, inthlan hma ngeia ruahman fel turin a ngen bawk. ECI hian tunkar chhung chuan an ngaihtuah hman dawn lo a, karleh lam hian ngaihtuah hman an tum nia sawi a ni.

NGO-te nena thutkhawmah hian CEO Mizoram P Jawahar chuan 2021 September 28 a Election Commission of India-in 4-Tuirial (ST) Assembly constituency by election a puan atang khan model code of conduct hman tan nghal a ni tih sawiin, MCC of 2019 Manual Chapter 20, point no 20.8.2-in a tarlan angin, inthlan atana campaign-na reng rengah sakhuana emaw hnambil thil thu hmangin thutiam emaw thuchhuah emaw siam tur a ni lo tih a sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy