MLA inthlanpui nei tur state 5 – Mizoram, Chhattisgarh, Madhya Pradesh, Rajasthan leh Telangana bakah an thenawm state 12 chu Ningani khan inbiak hmuh theihna kaltlangin chief election commissioner (CEC) Rajiv Kumar bakah election commissioner (EC) pahnih – Anup Chandra Pandey leh Arun Goel ten an kawm a. Mizoram chief secretary Dr Renu Sharma a tel.Election Commission of India hotute chuan inthlan hmachhawn state-ten harsatna liantham an nei lo leh thenawm state-te nen thawhhona tha tak an nei chu lawmawm an tih thu an sawi a. Vote zawnna hmanraw hrang hrang do tlan a, ramri kaltlanga dan loa ruihhlo, bungrua leh hmanraw dang tawlh ven leh state ramri khauh taka venhim a tul tih an sawi. State sawrkar hotute chu inthlan muanawm, dik leh langtlang, hlawhtling leh entawntlak lantir tum turin an chah a. Buaina leh tharum thawhna a awm loh nan leh vote a tlak that theih nan hma la turin an chah. Sawrkar thuneitute leh election official-te chu re-poll a awm loh nan hma la turin an chah bawk.
Mizoram aiawha thu sawitu chief secretary chuan ECI duhdan leh inkaihhruaina zawm chunga inpuahchahna kalpui zel a ni tih a sawi a. Mizoram chu state ralmuang tak a ni, tiin, tun dinhmunah dan leh thupek kenkawh kawngah harsatna liantham a awm lo tih a sawi. Thenawm state – Assam, Manipur leh Tripura thuneitute nen pawh inbiak pawh tawn reng a nih thu leh ngawrh taka ramri ven a nih thu te, campaign tawp hun atanga inthlan zawhfel thleng ramri khar tlat tum a nih thu te a sawi a ni.
Chief secretary tawiawmtu Mizoram DGP Anil Shukla chuan inthlan muanawm leh felfai neih a a beisei tih a sawi a. Venhimna kawngah central armed police force mamawh belh a nih thu sawiin, inthlan puan hnua enforcement agency-te hmalakna a sawi bawk.
Thutkhawmah hian inthlan muanawm, felfai leh langtlang neih a nih theih nan ruahmanna siam niin, inthlang mai tur state bakah an thenawm state kaltlanga dan lova thil tih dona kawnga thawhhona tha zawk a awm theih nan ruahman a ni. Vote zawn nana sum, ruihhlo leh therhlo dang a hluar loh nan ramri ven uluk a tul thu sawi a ni a. Inthlang tur state 5 leh an thenawm state 12-a chief secretary leh director general of police ten inthlan kaihhnawih inpuahchahna, mamawh leh hmachhawp an neih an sawi.
ECI hotute hian Ningani vek khan Mizoram chief electoral officer Madhup Vyas leh district hrang hranga observer-te chu inbiak hmuh theihna hmang tho hian an thutkhawm pui a ni.
ECI-in inthlang tur state ho dinhmun a zawtfiah
