Daily Newspaper

Economy-in recession thuk tak tawng mek

5

Covid-19 pandemic-in harsatna nasa tak a thlen avangin India economy chu kum 2020 ah 5.9% in a tawm tê tura ngaih a nih thu UN chuan report an siamah an tarlang a, nakumah erawh nasa takin a thang leh turah an ngai thung a. Mahse, economy tawm tê chuan sum lakluh tam tak a tichhe hlen dawna ngaih a ni bawk.

U.N. Conference on Trade and Development (UNCTAD) tena Trade and Development Report 2020 an tihchhuahah khawvel economy chuan recession nasa tak a tawng mek niin an sawi bawk a.

Kuminah khawvel economy chu 4.3% velin a tawmte dawn a, kum tawpah meuh chuan economists tena coronavirus len tirha economy a nghawng tur an sawi aia $ 6 trillion vela nasain a tawm tê zawk dawn niin an sawi bawk.

“A tawi zawngin, khawvel chuan Brazilian, Indian leh Mexican economy te bo vek tluk a tawng mek a. Ram chhungah chetvelna a awm theih loh ang bawkin international economy-ah pawh a ni tho a, sum dawnna chu hmun ngaa thena hmun khatah tlahniamin, foreign direct investment 40% in a tlahniam a, pawisa inthawn pawh $ 100 billion in a tlahniam” tiin UNCTAD te chuan an sawi a, khawvel economy dinhmun chhiat thu an tarlang a ni.

UNCTAD te chuan South Asia ram te chu kum 2020 ah 4.8% in an economy a tawmte ang a, kum 2021 ah 3.9% ni turah an ngai bawk a. India GDP chu kum 2020-ah 5.9% a tawm têin nakumah 3.9% ni turin an chhut bawk.
“India ram bikah chuan virus leng dan nana lockdown khauh tak kalpui a nihna avangin productive activity a chawl thuap a, recession nasa tak a thleng a ni,” tiin an tarlang bawk.

Report chuan UNCTAD te chuan India GDP growth chu kum 2021 ah tun hnaia Indian economy growth rate zulin a san chhoh an beisei thu an sawi a. Mahse, “Kum 2020 a economy tawm tê hian permanent income hlohna a thlen thei,” tiin an sawi bawk.

US bikah chuan UNTCAD chuan GDP chu kum 2020 ah 5% in a tlahniam turah ngaiin kum 2021-ah 2.8% a recover turah a chhut thung a. China chuan kuminah economy 1.3% a thang a nei thung dawn a, kum 2021-ah chuan a economy thanna tur chu 8.1% a ni dawrh thung ang a, khawvela economic growth rate sang ber a siam zui ang, an ti bawk.

“Kumin hi khawvel economy tan hun harsa a ni a. Ram tam ber ten health pandemic atan an inring lo, lockdown chu nunna chhanhim nan leh health system humhim nana tihtheih awmchhunin a lang bawk si. Lockdown kalpui chuan economic crisis siamin chu chu virus tluka darhchak a ni bawk si,” tiin UN trade agency te chuan an sawi bawk.

Global recession in Great Depression a tluk
Kumina quarter hmasa pahniha data ang chuan thil siam chhuah te chu kum 2008-2009 ai khan nasa takin a tawm tê zawk a, thnekhatah phei chuan hriatphak china a tlakhniam nasat ber te a thleng hial a. Global recession chuan kum 1930 chhova Great Depression a tluk reng, tiin an sawi bawk.

Kum 2021-ah chuan a sawhkhawk a awm dawn chungin ram hrang hrangah a inang lo nuai dawn, thil chiang fak a awm chuang lo bawk tiin report chuan a sawi bawk a. Unemployment chu a san tual tual a rinawm zawk a, company tam zawk ten tlakchhiat an hnaih ang a, supply chain a derthawng ang a, confidence tlahniamin demand a chhe bawk dawn an ti bawk.

“Private leh public sector ah leiba a sang zual ang a, pandemic len hmaa a san ber lai a khum ang. Heng hunah chuan policy kalpui dik loh hlek a, kum sawm kalta thlir loh phei chuan nghawng chhe zawk siamin chu chuan recovery a tihchhiat dawn piahah kum sawm a hloh zui theih ang,” tiin report chuan a tarlang bawk.

Thil siam chhuah tlakhniamna nasatna ber tur chu developed ramah a ni an ti bawk a, ram thenkhat te chuan double-digit in tlakhniamna an tawk hial dawn niin an tarlang bawk a.

“Economic leh social a tihchhiatna nasatna ber tur erawh ram thang mekah a ni thung ang a, heng hmunah te hian dan pangngai ang lo a thil kalpui a sang a, foreign exchange an hmuh thatna ber commodities leh tourism a chhia a, leiba turu tak nei thei an ni,” tiin report chuan a tarlang bawk.

Mi maktaduai 90 atanga maktaduai 120 vel chu ram thang mekah rethei bakberhin a siam ang a, mi maktaduai 300 dawnin food insecurity an nei ang, tiin report chuan a tarlang bawk.

UNCTAD Secretary-General Mukhisa Kituyi chuan khawvel tha zawk siam turin chetdan fing neih a ngaih thu sawiin, “Kan thlah kal zel tur te dinhmun piahah kan chenna lei dinhmun tur hi thla lo la kal tura thutlukna siama kan chet danin a hril ang,” tiin Kituyi chuan a sawi bawk.

Report chuan economic activity a awm leh vat a, ram changkang tena tuna fiscal leh monetary measure an kalpui reng bawk si chuan employment chu a panggnaiin a awm mai dawn chuang lo va, ram tam tak te chu leiba nasa tak neiin sum lakluh inthlauhna chu a sang hle reng dawn niin an sawi bawk a.

Forecaster tena V-shaped recovery an sawi fo chuan inbum a awlsam tak a siam thei an ti bawk a. Recovery awm tur chuan nakumah khawvel pumah double-digit frowth a awm a ngai an ti a, ch chu awm thei lo a ni bawk tiin Richard Kozul-Wright, UNCTAD’s director of the division on globalisation and development strategies chuan a swi bawk.

Global recovery plan chu huaisen leh huapzo takin, hna siam leh hlawh sang zawk pek a nih theihnana macro economic tihlen thlurbing a ngai a, chu chu public investment lian tak hmanga chhut zuia cleaner energy, environment humhalh, sustainable transport system leh economy ngaihsak taka kalpui ngai an ti bawk.

(THE AIZAWL POST – Rampawn)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy