Nimin khan Union Minister for Agriculture Shivraj Singh Chouhan chuan sate hrang hrang agriculture minister-te virtual meeting a neihpui a, ‘Viksit Krishi Sankalp Abhiyan’ hlawhtlin theih nana thil pawimawh hrang hrang sawiho a ni a.
Union minister hian May ni 13 khan thlai thar chhuahte tihpun nana hmalakna campaign ‘Viksit Krishi Sankalp Abhiyan’ hi a lo hawng (launched) tawh a. He hmalakna hi ‘Lab to Land’ tih hlawhtlin nana duan a ni. Lab to Land programme hi 1979-a hawn tawh kha a ni a, a tum ber chu tun lai science leh technology hmanga agriculture sector dawm kan leh tihchangtlun a ni. Campaign-ah hian scientist-te chuan research-based hmanga lo neih dan tur farmer-te an zirtir dawn a ni
Union Minister hian agriculture chu India economy innghahna a nih thu sawiin India ram mipui zatve vel chu lo neia eizawng an nih thu a sawi a. Hei vang hian loneitute ni tin mamawh phuhruk a nih theih nan hma lak a tul thu a sawi a.
India ram mipui zatve (50%) vel eizawnna ‘agriculture’ kaihhnawih a nih laiin, Mizoramah chuan 70% vel ni tura chhut a ni thin a; chu ai pawh chuan a tam thei. Hetih lai hian, kan loneitute dinhmun hi a kang thei lo hle. Agriculture hi India ram pum huap anga economy innghahna ber nia sawi a nih laiin, Mizoram chuan kan state economy chawikanna turin agriculture hi kan la chawi sang lo hle a; a nihna takah chuan agriculture-a eizawng (70%) te hi an dinhmun a hniam em avanga kan state economy dinhmun pawh hi la sang thei lo a ni, a tih theih mai awm e.
Mipui 70% eizawnna hi kan chawisan loh chuan kan state economy hian san tik ni a nei ngai dawn lo tihna a ni a, loneitute dinhmun a kan rual rualin kan economy dinhmun chu a kang ve mai dawn a ni.
Tuna central programme ang hi a hlawk thei ang ber tura kan lo luhchilh thiam leh thiam loh-ah kan state economy hi a innghat dawn tihna tluk a ni bawk.
Economy innghahna: Agriculture
