Ecuadorean sipaite chuan Colombia nena an inrina bula ram ril chhah takah mi sualten ruihhlo an tawhna thin tuihnuailawng, ‘narco submarine’ an tih mai thin metre 35-a sei chu an hmu chhuak tih an sawi.
Semi-submersible hian tuialhthei gallon 6,000 (litre 22,700) a lo inthun sa a, ‘ruihhlo tawlha rei tak zin’ tura inpeih niin Ecuadorean defence ministry chuan an thuchhuahah an tar lang.
Tuihnuailawng hi President Daniel Noboa-a’n a sorkarin ruihhlo tawlhtu cartel-te laka indona a kalpui dan tur ‘thawh thar’ a puan hnu lawka hmuh chhuah a ni.
Khawvela cocaine siamtu lian ber ram pahnih inkara awm, Ecuador hi South America atanga US, Europe leh Australia thlenga dan lova an ram kaltlanga ruihhlo tawlhna ram pawimawh tak a ni mek.
Sipaite chuan tuihnuailawng hi Cayapas–Mataje nature reserve-a mangrove tona hmun hnawngah an hmu chhuak a ni.
A bulah hian camp an hmu bawk a, hei pawh hi mi sualten ruihhlo tawlhrukna tur lawng buatsaihna atana awmna atan an hman niin an sawi.
Metre 35-a sei tuihnuailawng bakah hian venhim hna thawktute hian speedboat paruk, outboard motor pasarih leh tuialhthei barrel tam tak an man bawk.
Sipaite hi beihpui thlaknaah hian ‘ralthuam keng tuten emaw’ an kap tih defence ministry chuan a sawi bawk a. Thuchhuahah hian man an neih thu leh ruihhlo an man thu an tar lang lo thung.
Noboa-a hian a ram atanga US-a ruihhlo lut dang turin President Donald Trump-a sorkar nen thawhhona tha tak an nei mek.
Tun kar tir lam khan Ecuador khawpui, Quito-ah US Southern Command commander, Gen Francis Donovan nen venhimna thila thawhdunna chungchang hi an sawi dun nghe nghe.
Hetih lai hian ruihhlo tawlhna atana hman tuihnuailawng hai chhuahnaah beihpui thlaknaah hian US sipaite an tel ve thu erawh sawi a awm lo.
US hian September thlaa ‘Operation Southern Spear’ a kalpui tan atang khan Pacific tuipui leh Caribbean-a ruihhlo phur nia rinhlelh lawngte chu vawi tam tak a lo bei tawh a. Heng beihnaah hian mi 150 chuang an thi tawh.
Ecuador sipaiten ram rilah ruihhlo tawlhna tuihnuailawng hai chhuak
