Daily Newspaper

EDEN HUAN DEPARTMENT LEH MAU MAWLH MAI HI !

52

-Jeremy M. Pudaite

Mau hi kan ram leilungah a tha duhin, zaa 57 zet hi mau hmunin a tuam a. Mau chi 20 vel awmin, kumtin mau vaibelchhe 20 vel hralh atana lak theih anga chhut a ni. Heng kan rama Pathianin thing leh mau leilunga a dah, a hmanna tam em em si te hi kan hman tangkai a, ram hruaituten ruahmanna fel tak nena hma an lak chuan kan ram ei leh bar dinhmun hi hei ai hian a ziaawm zawk ngei a rinawm.

Tuna kan Chief Minister leh Horticulture Department changtu ni bawk Pu Zoramthanga hian a department chan Horticulture department chu kan ram ei leh bara revolution thlentu ni tura a ngaih thu te a lo sawi tawh a. Horticulture Dept hi Eden Huan department tiin kum 20 liam ta khan a hming a lo vuah tawh bawk . Chutiang khawpa department ngaihhlut leh pawimawh chu tun hma atanga chhutin, vawiina kan hun tawn leh kan hun kal zel tur atan eng ang takin nge kan ram hotuten an kalpui chhoh zel tih hi chhut ngun a ngai ta hle.

Kum 22 dawn liam ta, kum 1998 khan tuna kan Chief Minister Pu Zoramthanga hian a CM tirh khan Horticulture department-a thawktute hmaah, “Department thar kan ni in ti tak na a, department zawng zawnga senior ber ‘Eden huan department’ kha in ni ve sa hrim hrim a. Chuvangin Eden huan kha horticulture deptt.-a intan a ni a. Kan ram economic system tidanglam tura hmanraw pawimawh ber in nih avangin he deptt. hi ka han chelh chat a ni’ ti-a sawiin, kan ram hi a pawisa fai ang ni lo, a bungraw resources-a hausa tak kan nih thu te, central sorkarin plan pawisa do let ve tura min tih chuan ”A nih aw! Sawhthing kan rawn tawlh thla ang aw. Sapthei kan rawn tawlh thla ang aw. Kan resources te hi rail head atangin kan rawn mobilised dawn e, lo dawngsawng rawh u le. Kha chiah kha kan neih chhun a ni’ a ni kan ti ang” ti-a sawiin, ”Mizoram economics system hi Horticulture hmanga dum leh vâr anga chhim leh hmar anga thlàk ka tum a ni,” tiin a sawi bawk.

Kum 2018 khan, Congress sorkara ‘Eden Huan’ Department changtu Pu R. Lalzirliana chuan Horticulture hnathawh hi Eden Huan atanga lo intan tawh, Bible nen pawha inrem thlap a nih thu leh kawng tam taka intodelhna kawng a awm thu leh chutiang tur chuan mithiam ten hmangchang hre taka ruahmanna an la duan chhuah a beisei thu a lo sawi ve tawh bawk.

Nikum khan Horticulture Department bultuma hmarchhak bialte tana Mission for Integrated Development of Horticulture chungchang inrawnkhawmna Aijal Club-a neihah, tuna kan CM Pu Zoramthanga hian mau sawngbawl lam chu a tuina a nih thu leh Chief Minister a nih hmasak tum pawhin Mau Chief Minister ti hiala an koh fiam thu sawiin, hei hi a chhan chu mau hmanga intodelh tura nasa taka tan a lak vang niin a sawi a, an sorkar loh kum 10 chhung khan hemi kawngah hian tha thlah lova theihtawp a chhuah reng thu leh an ruahman danah ram hectare 2-a zauah mau chingtuten kum khatah cheng nuai 5 atanga nuai 9 vel an lakluh theih tur thu a sawi a, chu aia zau enkawlte phei chuan kum khatah cheng vaibelchhe khat chuang an la lut thei dawn niin a sawi bawk.

Nikum vek khan Assembly House-ah Pu Lalduhoma’n Mizoram Bamboo Plantation chungchang a zawt a. Hetah hian CM chuan sorkar hmalak tum dan sawiin, mau hmanga hma an lak tur chu khaw hrang hrangah mipuite intelkhawma Society anga kalpui tum a nih thu te, a tlem thei ang bera chhut pawhin thingtlang in za khua vel chuan rua hi kum khatah nuai 3 vel an thar theih dawn thu leh, hemi sawngbawl tur hian an khaw hmunah Industry din nghal zelin, thalaite tan hnathawh tur siamtu tha tak a nih nghal dawn thu sawiin, hlawhtling taka kalpui tur chuan a panna kawng tha erawh neih a ngaih dawn avangin link road laih lamah pawh tanlak a nih tur thu a lo sawi tawh bawk a. A sawi zelnaah, Forest Department kuta mau a awm laiin a chi tha vak lote pawh an lo sem palh avangin ama huana a chin zingah pawh hralh atana tlak lo a lo awm nual tawh avangin, Sorkar Flagship Programme, SEDP hmanga hma an lak turah chuan Mau chi tha chin tur chi 2 chu phai lama mithiamte an siam tir fel tawh tih a sawi a, a chi pakhat phei chu ama huana awm atanga an lak chhuah a nih thu sawiin mithiam ten kum 6 vel zet an buaipui tawh a nih avangin tha hle tura a ngaih thu leh a chi siamna hmun hi Department lam pawhin a hmunah an enfiah tawh tih a sawi bawk. He thil hi opposition party ZPM general secretary ten an bawhzuinaah, CM huanah hian mau/raw tiak 4000 vel phun a nih thu te, phun belhna tura ruahman chu a dung metre 300 leh a vang metre 100 vela zau niin, huan enkawltute sawi danin July-ah raw tiak 3000 leh August-ah 1000 rawn thleng anga sawi a ni. Sorkar lam mi emaw, department lama mi thiam emawin an tlawh tawh leh la tlawh loh zawhna chu huan enkawltute chuan, chutiang mi an la hmuh loh thuin an chháng niin an sawi bawk. Huan enkawltute leh CM-in June thla budget session-a raw tiak rawn thleng tawh chungchang an sawi hi Horticulture Dept-ah RTI hmanga zawh a nih chuan, department lam chuan raw tiak a lo thlen thu an hre lo a, supply turin tender pawh chhuah a la nih loh thuin an chháng thung ni-a sawi a ni bawk. Heng thil kal vel neuh neuh hian mipui ngaih a tithalo chho thei a, sorkar ruahmannain rinhlelh a kai chho ang tih hlauhawm tak a ni. Intodelhna kawng kan zawh tan danin rin a kai loh chuan intodelh kan la hlat lehzual dawn a ni.

Nikum July 15 khan Mizoram Horticulture Dept. chuan Agriculture Today buatsaih Best Horticulture State Award chu Horticulture changtu CM Zoramthanga hoin an lawm a. Pu Zoramthanga chuan, ei leh barah Mizoram a intodelh tawk loh vanga Bhaga vel atanga an duh duha thunun theih tawka Mizo mipuite an ngai chu a tlawm thlak avangin Mizorama thar chhuah theih chi, chaw, thei, thlai leh sa hmanga intodelh tura tanlak chu tih makmawh a nih thu te, hetiang tura ram hectare 70,000 lai kan neih thu te, rua hmanga Mizoram intodelh tura tan an lakna turah Society kalphung hman a nih dawn thu leh kum rei lo teah sorkar hnathawk hlawh aiin kuthnathawktute sum lakluh a tam zawk dawn a vangin, IAS pawhin an hna an bansan duh hial a rin thu te a lo sawi tawh bawk.

Mau chungchang hi SEDP hnuaia Bamboo Development Board Vice chairman Dr K. Pachhunga pawhin, ”The future technology of the world is bamboo technology’ tih a ni tawh. Sum hi a páwng a taka lak chhuah theih a ni lo a, sum dil nan hla sak a ngai. Kan ram hi a buai si lo a, tuilian leh thli chhiate’n a ti buai si lo a, chuvangin, sum hâi luh nan Chief Minister hian bamboo policy-ah min luhpui a, hetianga mau hman tangkai dan leh a pawimawhna a hria hi a changkang a, amah pawh a ngaihsanawm phah a ni,” a lo ti ve mek a. Mau hmanga sum hailuta intodelh tum kan nih avangin mau chi tha lakluh a nih tur thu leh Tamil Nadu-a Masuri-a laboratory-ah mau lâk luh tura enchhin chu ft. 120 a sei, malpui tiat, cháng nei lo a ni” a ti bawk.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy