Daily Newspaper

Editorial…..

35

Covid kara inbeihna

Covid-19 chu tunhmaa khawvela la awm ngai lo, natna hri thar a nih avangin a dona kawngah khawvel ram sawrkar thiltithei tak takte pawh an che buai hle a. He hrileng natna hrik (virus) nihphung hi mithiamten an zir chiang mek a, vaccine pawh an la siam chhuak thei lo a ni a, a inven dan turah pawh mithiamte thu leh hla a danglam chho zut a.

Mizoramin he hrileng kan hmachhawn chungchangah, a tir lamah khan, MPCC president Pu Lal Thanhawla chuan Mizoram sawrkar tan pawh hmalak dan tur hriatthiam a harin, tihawm tak tih loh emaw, tihawmloh tak tih emaw pawh thil awm thei a ni a, sawrkar hmalakna kan tawiawm thiam hi a tul dawn a ni’ tih lam hawiin a lo sawi chhuak tawh a; ‘ram leh hnam huap harsatna a lo thlenin, hruaitu hlun te ngaihtuahna nge nge chu a lo fim a ni e’ tiin mipui pawhin he a thusawi hi a puitling an ti hle niin a lang.

Hun a lo kal zel a, arkhawthim dai an tih ang deuhva kal kan nih miau avangin, Covid dona kawng hrang hrangah sawrkar kalphung chuan fak leh sel a hlawh chho zel a. Tun hnaiah Mizorama Covid positive tam ber tum a thlen hnu lawk khan, MPCC chuan, ‘sorkarin Village Council leh Local Council inthlan a buatsaih luih avangin mipuiah Covid-19 nasa takin a darh mek a; CM Relief Fund hmangin a thlawnin test kalpui ni rawh se’ tih te, ‘MNF sorkarin Covid-19 a hmachhawn danah ruahmanna fing a awm loh avangin kan buai chho zel a. Covid-19 positive-te enkawl dan a fel tawk loh avangin Mizoramah Community spread a thleng tan mek a ni’ tiin thuchhuah an siam a.

Heng thuchhuahte hi sawrkarna chang mek MNF party lam chuan, ‘Congress hnapui ber chu tanpui aiin sawisel tur lo dap hi a ni’ tiin ‘heti zawnga mipui ngaihdan hruaikawi lo tum phet hi an tan pawh a tha lo ang’ tiin thuchhuah hmangin an chhanglet bawk a.

Ruling kalphung dik lo leh fel lo dapchhuah a, khalh ngil tura hma lo lak hi opposition lam tihtur leh hna, ram leh hnam thatna tura mawh an phurhna tur pawh a ni. Chutiang bawkin, ruling lam pawhin, tih dikloh leh kalphng fel lo a lo awm pawh a, tih dik leh insiamthat chu ram leh hnam thatna tura mawh an phurhna a ni nghal bawk. Tuna Covid dona kawngah pawh tih that te, tih dik tawk loh te pawh a awm ang tih a hriat a. Chutiangah chuan rilru zau leh puitling tak pu chunga an hmachhawn thiam a pawimawh.

Covid-19 hri darh zel chungchangah hi chuan, hetiang hi chu thleng chho zel tura mithiamte lo sawi lawk a nih avangin, inthlan buatsaih leh buatsaih loh thila kaih luh talh hi a rem teh teuh lo niin a lang.

Eng pawh ni se, fak leh selna hi chu a awm zel dawn; sawifiah ngai te, insiamthat ngai te pawh a awm zel dawn; kan do Covid-19 pawn lama inbeihna thleng lova, tanrualna a pawimawhzia hre chunga rilru puitling put tlan a pawimawh hun lai tak a ni e.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy