Daily Newspaper

Editorial…..

8

Community transmission leh a behbawm…

Mithiam ten Covid-19 hrileng darh dan chhawng (stage) hrang hrang an then danah, stage 1 leh stage 2 chu Mizoramah a thleng tawh a; stage 3-na – ‘community transmission’ hi a state pum huap ang pawhin kan hnaih ve ta hle niin a lang. Abikin, tun dinhmunah, Aizawlah chuan local transmission chu a thleng tawh a, community transmission hian a zui mek a tih theih tawh a; a chhan pawh, Covid-19 positive zingah, ‘khawi atanga hri hi kai nge an nih chhui chhuah hleih theih loh’ an awm nual tak avangin. Hetih lai hian, sawrkar tan pawh, ‘Mizoram pum huapin community transmission hi a thleng ta e’ tia puanzar theih a la ni chiah lo pawh a ni ang a; Aizawl bikah hi chuan ‘community transmission a thleng tawh’ a tih theih tawh awm e.

Mithiamten December thlaah hri kai mi 5000 vel tling tawh tura min chhûtsak hi tuna kan dinhmun han thlir hi chuan a dik thei mai dawn niin a lang. Hri kai enkawl, dam chhuak hi nitin engemawzat awm bawk mah se, hri kai thar pun chak dan dinhmun hi hetiang a nih chhoh zel chuan, hri kaite dahna/enkawlna hmun hi ngaihtuah ngai tak a ni ta a. Mi sangnga vel enkawl/dahna tur hmun hi tun atanga lo ruahman lawk tawp mai hi lo invenlawkna atana kan tihtur pawimawh tak chu niin a lang ta.

Kan dinhmun han thlir hian, kum khat dang hi chu Covid hian nunphung pangngai min zawhtir thei tak tak dawn lo niin a lang a, zirna in pawh hi kuminah chuan dan pangngai anga kalpui theih a ni tawh dawn lo tih a chiang tawh a, hrileng dona kawnga kan insawrbing hi a tul miau tawh avangin, covid caring centre ruahman chungchangah pawh zirna in thenkhat hi chuan a tawrh mai a tul dawn niin a lang bawk.

Tuna kan tihtur pawimawh tak nia lang ta chu, hrileng inkai darh dan stage hrang hrangte hi engtikah emaw chuan kan la paltlang chho vek dawn tih ngaihtuahna pu chunga, chawpchilh taka ruahmanna kalpui lova, hmathlir thui zawk nei chunga ngaihtuahna kan sen law law hi a pawimawh tawh niin a lang.
Covid darh nasa tur vengin theihtawp chhuahin kan lo bei a, kan tangrual a, heti khawpa tanrualna tha hnuaiah pawh kan dang hneh lova, kan veng seng lova, heti hian min luhchilh chho ta chu a ni a. Khatiang khan tangrual lovin lo inthlahdah phei ila chuan, tunah hian state tam tak dinhmun ang hi kan dinhmun tur a nih a rinawm. Chuvangin, community transmission a lo thleng ta a nih pawhin, he hrileng do nan hian a hma aia nasa kan tanrual hi a pawimawh deuh deuh tih kan vawn tlat a pawimawh dawn hle a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy