Daily Newspaper

Editorial…..

37

Invenna tha ber – fimkhur

State pawn lama zin veivahna nei lo, tualchhunga hri a rawn luh hnua tu emaw ber hnen atanga kai nia ngaih mi zathum dawn an awm ta. Covid-19 hri kai tawh si, symptom lang chhuak si lote chu midang hri kai darhtu zinga mi an nih thu mithiamten an sawi a.

Hei hi thil awm dan a nih chuan, fimkhur a ngai zual hle tih a lang. Covid-19 inkaidarhna hi hmanrua leh bungruaa virus chambang khawih atanga kai theih niin sawi ni mah se, inkai darh tamna ber chu mihring leh mihringah a ni tih mithiamten an sawi tawh a; chuti a nih chuan, tuna mi zathum deuhthaw, hri an kaina chhuizui theih tawh si lohte hian mi tu emaw ber atangin hri an kai tih a chiang a. Chumi awmzia chu, hri kaia te an fimkhur tawk lova, hri kai darhtute pawh an fimkhur tawk lo bawk a, fimkhur lo leh fimkhur lo ten hri an inkai chhawng tihna a ni ber awm e. Hri laka himna tura mithiamten tihtur an tih, hmaikawr vuah, midang nena inhlat taka awm leh insilfai uluk te hi a nihna tur angin kan la zawm tha tawk lo hle tihna a ni thei bawk ang. Vanduai hrim hrim pawh awm theih a ni a, hei hi chu a tam vak lo tura ngaih a ni.

Symptom lang chhuak si lo, hrileng hrik pai tawh si, mahni inrinhlelhna nei bawk si lote hi tun dinhmunah chuan, vantlang zinga hri darh tamna chhan hi a nih a rinawm a. Symptom nei te chu sample enfiah niin an dinhmun an hrechiang mai a, quarantine centre-a awmte lah, vantlang zinga awm an ni pha bawk si lova, chuvangin mipui nawlpui zinga ngaihtha lena leng chhuak zingah hian hri inkaidarh hi a awl dawn hle niin a lang ta a. Chuti a nih chuan, mi tu te pawh, kan bulhnaia mite hi Covid-19 positive an lo ni reng thei tih rilru pu chunga kan fimkhur tlan vek hi invenna tha ber chu a nih a rinawm ta a ni.

Hun rei tak nunphung pangngai zawh thei lova kan awm tak avang hian inthlahdah leh ngaihsam pawh a awl viau dawn niin a lang a; sakhaw thila puipunna emaw, inneihna thilah emaw, chhiat tawhna thilah emaw, inkaihhruainain punkhawmnaa tel thei zat a biktuk ang zawm mai avanga he hri hi hlauhawm nep ta a ni chuang lova, pungkhawm tlem zawkah chuan hri kai an lo awm palh pawha inchhui zui a awlsam zawk dawn avanga hetianga bituk mai chauh hi a nih hmel a. Chuvangin, punkhawm thila inkaihhruaina dan zawm chung pawhin, thil pathum face mask, social distancing leh sanitizing te fimkhur taka zawm hi invenna tha ber a la ni reng a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy