Daily Newspaper

Editorial…..

13

Covid do leh eiruk do

Tun hnaia DLAO Lunglei leh NSS Unit Lunglei Government College te tangkawpin, khawtlanga dikna leh rinawmna dinhmun enfiahna “Local Level Integrity Perception Survey 2020” an buatsaihah khan, mi 533 ten zawhna hrang hrang an chhang a, hotute atanga thil dik lo ti tura nawrna tawngtu chu za zela 29 an tling.

Survey result hi tunhnai khan tlangzarh niin, result-in a tarlan dan chuan, za zela 78 te chuan Village Council-te eirukna lakah an fihlim an ring lo va, za zela 48 te chuan an thawhpui thenkhatte eirukna lakah an fihlim lovin an sawi bawk a. Za zela 68 te chuan an hotute atanga thil dik lo ti tura nawrna an tawn loh thu an sawi a. Zawhna chhangtu za zela 78 te chuan, hlawh leh sum lakluh phu lova hausa an veng chhungah an awm niin an sawi a, za zela 22 te chuan an hriat ve lem loh thu an sawi bawk.

He survey-a zawhnate hi a chhangtute tana rinthua chhan chi deuh vek niin lang mah se, zawhna pakhat, “hotute atanga thil dik lo ti tura nawrna an tawn leh tawn loh” chhanna hi chu rinthu mai ni lovin thudikah a pawmnahawm viau awm e; za zela 29 te chuan an hotute atangin thil dik lo ti turin nawrna an tawng tih an sawi a ni.

Hlawh leh sum lakluh phu lova hausa an awm thu hi zaa 78-in an sawi a, hei hi Mizoram pum huap ang pawhin a dik a rinawm a, he survey result hi Mizoram dinhmun anga ngaih theihna chin a awm ngeiin a rinawm a ni.

Corruption Perception Index 2018-in a tarlan danin, India hi khawvel ram 180 zinga eirukna hluar dan indawtnaah 78-na a ni a, India ram aia eiruk hluarna ram 102 an la awm tihna a ni. India ram state zingah – Rajasthan, Bihar, Uttar Pradesh, Telangana, Punjab, Karnataka, Uttar Pradesh, Jharkhand, Tamil Nadu te chu eiruk hluarna state niin India Corruption Survey 2019 (hei hi Oct 2018 -Nov 2019 inkar) chuan a tarlang a. Eiruk tlemna state zingah Kerela chu pakhatna niin Goa, Gujarat, Odisha, West Bengal, Haryana leh Delhi ten an dawt a ni.

Chumi awmzia chu, Mizoram hi eiruk hluar lama a sang pawlah kan lang lova, eiruk tlemna state zingah pawh kan lang hek lo; a laihawl velah kan awm a ni mahna. Northeast state zingah tunhma khan Manipur, Nagaland leh Assam te kha eirukna lamah an langsar a, tun hnuah hian Mizoram pawh hi a langsar pawlah a tang ve ta nia sawi a ni a. Ram hruaitute ngei ngei pawhin Mizoramah eirukna a hluar tawhzia an sawi chamchi a nih kha.

Kristian state tia chhal ngam ni si, eiruk tlemna state zinga Mizoram a lang pha lo hian Mizoramah eirukna a hluar thawkhat tih a tilang chiang hle. Eirukna hi chu khawvel awm chhung chuan a reh dawn lova, mahse Kristian state tan chuan, ram pakhata eiruk tlemna state dinhmun luah pha lo nih hi thil zahthlak tak a ni.

Tuna Covid-19 donaa mipui leh sawrkar kan tangrual ang bawk hian, eiruk do kawngah pawh kan tanrual thiam chuan, India rama ‘Least Corrupt State’ zingah kan tel ang a, chu chuan hmasawnna nasa tak a keng tel nghal dawn a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy