Daily Newspaper

Editorial…..

15

Inrenchemna leh ram hruaitute

MP leh minister-te hlawh leh hamthatna zaa 30-a tihhniamna Bill pahnih —The Salaries and Allowances of Ministers (Amendment) Bill, 2020 leh, The Salary, Allowances and Pension of Members of Parliament (Amendment) Bill, 2020 te chu, Lok Sabha-in a lo passed tawh hnuah, nimin khan Rajya Sabha pawhin a passed ve leh ta a. Hei hi kumin April ni 1 atanga kum khat chhung hman tura tih a ni.

He Bill pu luttu hian hrileng mek Covid-19 do kawnga sawrkar laipuiin sum lama harsatna a tawh lohna tura siam a nih thu a sawi a. MPLADS (Members of Parliament Local Area Development Scheme) pawh kum hnih chhung tihtawp lailawk a lo ni tawh a. MPLADS Fund hrek mek chungchangah erawh, eptu lamin MPLADS Funds chu Covid-19 pandemic dona-ah an bial chhung mipuite tana tangkai taka hman theih a nih avangin a ngai anga kaltir leh turin an ngen nasa hle thung a ni.

Heng Bill pahnihte hi inrenchemna Bill tia sawi theih a ni awm e. Covid-19 pandemic avangin economic activity a tlahniam a, hei vang hian sawrkar laipui sum hmuh tur nasa takin a tlahniam a. Ram leh hnamin harsatna a tawh tak avangin, inrenchemna kalpui a ngai a, ram hruaitute hian hma kan hruai a ngai a ni, an tihna a ni deuh ber awm e.

Mizoram dinhmun hi han thlir chian chuan, Covid-19 pandemic hi thleng ta lo pawh ni se, inrenchemna kalpui mamawh em em a ni sa a. Hei hi Mizoram sawrkar pawhin a hria a, a theih ang angin inrenchemna (austerity measures) lam hawia hmalakna pawh a lo nei nual tawh a. Sawrkar department office expenditure pawhin a tuar nual a ni.

Hetih lai hian, tun hnai September thlatir lama nithum awh assembly session neihah khan, “The Mizoram Legislative Assembly (Grant of loans and Advances to Members) (Fifth Amendment) Rules, 2020” chu pawm a ni a; hei hi, a lehlama inrenchemna kalpui a nih mek lai nen chuan a inhmeh fahran lo niin a lang.

Ram hruaitute hian ram kaihhruai hna an thawhnaah hian, ramin harsatna a tawh sutkian kawngah tawrh a tul pawha a tuar hmasatu, a hmatawnga an tan thiam phawt chuan, an hnungzuitute thathona a siam ang a, chu chuan hmasawnna kawngah rah tha tak a chhuah thin ngeiin a rinawm a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy