Daily Newspaper

Editorial…..

38

Loneitute leh Mizoram

Lok Sabha-in loneitute kaihhnawih Bill pahnih a lo passed tawh, tun Pathiannia Rajya Sabha-in opposition lam dodalna kara a passed ve leh tak chungchangah Haryana state-a loneitute chuan lungawi lohna lantirin kawngpui an dang a. Punjab-ah pawh Modi lim halin lungawilohna an lantir bawk a. Nimin mai khan SAD party hruaitute chuan India president hmuin parliament-in bill a passed te chu pawm lo turin an ngen a. Heng bill te hi ‘anti-farmer bill’ tiin an sawi nghe nghe a ni.

Heng bill pahnih passed chungchangah hian, nimin khan BJP Mizoram Pradesh president chuan press conference neiin, Bill te hi loneitute hamthatna tur leh hmasawnna tur rahbi thar a ni tiin, Mizoram loneitute pawhin an lo chhawr theih turte pawh engemawzat a awm niin a sawi bawk.

Parliament-a Bill pahnih passed takte hi Mizoram tana a thatna tur emaw, a thatlohna tur emaw hi tuna lo sawi ve mai theih a ni em tih hi zawhna lian tak a ni awm e. A chhan pawh, agriculture marketing system tha a awm theih nana Mizoram legislative assembly-in “Agriculture Produce Marketing Control (APMC) Act, 2008” a lo siam tawh pawh, kum 2018 thleng khan AMFU lamin a taka kalpui turin sawrkar an la nawr lauh lauh reng a nih kha. Central lam Bill passed hian min rawn nghawng pha thei dawn em tih chu, ram hruaituten loneitute an ngaihsak leh ngaihsak lohvah a innghat thui hle dawn niin a lang.

Tuna state thenkhatin Minimum Support Price (MSP) kaihhnawih an buaipui luai luai angte hi Mizoramah chuan hriat tur a awm pha ve lo a. Central sawrkarin MSP hnuaia thlai (crops) hrang hrang 22 a dah zingah hian, Mizorama thar chhuah ve theih chi chu Buh leh Vaimim deuh chauh hi niin a lang a. Mahni khamkhawp Buh thar chhuak lo tan chuan MSP sawirikna tur a awm lo ang a. Vaimim erawh, tunah hian contract farming angreng deuh kalpui tan niin a lang a, hei hi thlai chingtuten engtin chiah nge an thatpui theih dawn tih chu hunin a la rawn hril leh dawn chauh a ni.

Mizoram leilung atanga hlawk taka thar chhuah theih ber Sawhthing lah hi, kan buaipui rei tawh ngaihtuahin, eng sawrkar mahin an la champion pui thei lo bawk a. Loneitute dinhmun hi tun thleng hian a la derthawng hle a. Ram hruaitute hian agriculture-a innghat kan nihzia an sawi thin a, kan innghahna bera mi pawimawh ber loneitute dinhmun chawikan kawngah, hma kan sawn chak thin lo lai tak hi a veiawm takzet tawh a ni.

(THE AIZAWL POST – Article)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy